Amor e Mèl al venter!

Data

03 de agost 2016

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Martina Iori da Dèlba l’à publicà e prejentà sie prum cd dal titol “Amore e Buscofen” sun Ciampac en ocajion di conzerc “Val de Fascia Panorama Music”.
Sun Ciampac, te anter si monts, chi monts olache si giaves e besaves i é jic a fèr fen vigni istà, Martina Iori l’à prejentà sie prum cd “Amore e Buscofen”, na regoeta de nef cianzons te trei lengac desferents: ladin, talian e ingleis. En dut carantaot menuc de musega scrita da ela e sonèda ensema ai musizisc’ de profescion Marco Stagni e Enrico Tommasini.

L titol “Amore e Buscofen” l vegn ca da sia esperienzes de vita che vèlch outa ge à fat vegnir “mèl al venter” e che la é stata bona de passèr via, no con na medejina, ma con la musega, un di amores maores de sia vita e che l l’à didèda a jir inant.

L’é coscita che l’é nasciù l’album “Amore e Buscofen” olache l’é ite i toc fosc più emportanc de si vinteunegn de vita: l’é i concorsc de musega de mendranza venc del 2014 con “Via con mia musega” e n viac a Amsterdam; l’é ela “Martina” te anter i etres che ge domana de scriver na cianzon e l’é i problemes d’amor che no troa resposta te “Olache ties?”, e amò l’é sia reijes ladines con na sia verscion de la ciantia fascèna “Lò che i pré”.

N album rich de sentiments e de emozions che l’à volù ge dedichèr a sia mère Lucia che, desche si parents più strenc, l’à cherdù te ela più che Martina enstessa.

Enstadì sun Ciampac a la compagnèr l’era Marco Stagni al contrabas e Enrico Tommasini a la baterìa, Martina enveze l’à sonà dal vif la chitara, l’ukulele e l piano. L conzert, che l fèsc pèrt de la rassegna “Val de Fascia Music Festival”, l’à soscedà aprijiament tel publich che l’à batù la mans su la musega e l’à domanà de sonèr amò doi toc.

L cd l’é stat registrà al Cat Sound Studio a Badia Polesine te la provinzia de Rovigo de gra al sostegn del Comun general de Fascia e a la colaborazion de la sociazion de cultura e musega “La Grenz” de Moena.

Se pel ge l domanèr a Martina o l comprèr ence a l’Union di Ladins de Fascia a Sèn Jan.  (vr)