La Usc di Ladins

A Moena pian pian dut se envìa endò envers la normalità. Ma coluna él la caujes che à portà a chesta agajon? Él evenc che no se pel perveder? Él ence colpa de l’om? E che se podessel fèr per schivèr che fac de chesta sort sozede amò?

Ge l’aon domanà a Thomas Zanoner, n joen da Moena che à gran competenza sun chisc temes, ajache l’é laureà en geologìa, l’à fat ence n dotorat e l colaborea amò con l’Università de Pèdua.

“Chel sozedù en martesc ai 3 de luio l’é stat de segur n event particolar, na condizion olache doi temporai, un che vegniva da Busan e l’auter da le Pale de Sèn Martin, donca da la val de Sèn Pelegrin, i é ruè e i se à troà proprio ensema sora Moena e l’é stat na precipitazion straordenara. Però se cogn dir che coi mudamenc climatics l’é più fazile che le precipitazion straordenare le sozede amò.

Dapò l’é ence na serie de autre robe che le à aidà l’esondazion. De segur l fat che l rif de Costalongia l sie stat serà int te chele roste artifiziale l’é na “colpa”, se se pol dir coscì, de l’om, ma oramai l’é n mulge de egn che l’é encanalà int e l’é stat fat sù ciase e hotìe vejins, soraldut te l’ùltima part, olache l se tra te la Vesc. A livel idrologich e idrogeologich ge voless no aver nia enlongia l rif, ancöndì no i lasciasse più far coscita, ma le ciase oramai le é, se cogn gestir na situazion critica. De segur le opere che à fat i Bacini Montani i à servì a limitar l dan: le briglie l’é n gran bel laoro, ma se cogn semper vardar de far la manutenzion, tegnir nete le briglie e ence dut l ghebo del Rif de Costalongia e ence de duc i rives più picoi.

N gran problem l’é chel di doi ponc, chel su la strada e chel ló dal pistor, che i é basc e se à fermà l material che l’à fat da diga: per chisc doi ponc se podesse vardar de troar na soluzion per schivar n gran dan tel davegnir.”

De più su La Usc stampèda en vender ai 13 de messèl





 (Lucia Gross)