Sèn Nicolò stravardene da le aghe

Data

15 de dezember 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Chest an la sagra de Poza é stata dedicada ai Studafech e don Andrea à benedì le aghe recordan la devozion veiora de la jent al sènt patron che à salvà l paìsc da l’agajon.


Sèn Nicolò l’é l Sènt più benvolù dai bec e l’é l Sènt che deida fora i più purec e deboi descheche, aldò de la storia (o lejenda) l’à fat con le trei touse che era destinade a fenir su la strada, ge dajan na dota percheche le posse se maridar.

Chest Sènt l’é ence l patron de Poza, e en jebia ai 6 de dezember l’é stat n gust veder la gejia piena de scolees e de bec, che i à empienì i benc, ma i se à dat jù de tropes ence desche servidores, ciantores e letores.

Chest an, proprio per defener i più pìcoi e timorousc, Sèn Nicolò à tegnù i Krampus dalonc dal tendon e l ge à descomanà ence de star dedant gejia a spetar che i scolees vegne fora da messa. Ampò i bec i à podù ben segur jir a “sciampar dai diaoi” da sera, e ence le sere dant: na tradizion amò viva e fona te paìsc, a chela che, con ardiment o con trìcola, béleche nesciugn vel renunziar. Na tradizion che ampò, desche dute le tradizion, col temp la muda, tant che se taca a veder stroz ence Krampus auc n metro e n scioldo...

Apede chest don Andrea l se à recordà che Sèn Nicolò, per la jent da Poza, l’é ence l Sènt che stravarda da le aghe. L’é storia, no lejenda: chi de età amò se recorda – zachei met dant ence l’an: l 1905 – de chela outa che l ruf de Ruacia l’era dò a jir per sora, e la jent che era te la pìcola gejia de Sèn Nicolò sa Meida l’aea na gran tema, ma l preve l’à uzà sù l Santiscim contra chel’aga manaciousa, che desche per miracol l’à desvià so cors, sparagnan gejia e jent. Fosc apontin da enlouta l ruf vegn chiamà “de Sèn Nicolò”.

Coscita chest an don Andrea l’à volù renovar la devozion a Sèn Nicolò che ne stravarda da le aghe. 

De più su La Usc stampèda de vender ai 14 de dezember 2018.  (Lucia Gross)