En recort de Tone Poldin

Data

06 de jené 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
“Le stagioni di Tone” l’é n liber scrit dal diretor de Vita Trentina Diego Andreatta, che recorda i enteresc e i aspec poliedrics de la vita de chest menacrep, om de socors, pascionà de crepes e n muie de auter.


Fèr memoria, recordèr la persones e ge palesèr noscia recognoscenza, l’é emportant per no desmentièr che dut chel che aon d’intorn l’é frut del lurier, de l’empegn, de la vita de chi che é stac chiò dant da noi e i ne à didà a fonèr noscia reijes tel teren e a vardèar en aut envers l ciel.

L’é stat con chest conzet, palesà dal president del Consei del Comun de Sèn Jan Cesare Bernard, che pech dant la festes de Nadèl se à avert la prejentazon de na neva publicazion. N liber su n om mencià da pech più che n an, ai 5 de dezember del 2017: Tone Rizzi de Poldin. N menacrep, alpinist, hotelier, pascionà de minerèi e n muie de auter amò.

“Le stagioni di Tone”, chest l titol del liber dat fora da l’editor Vita Trentina che, à dit l’autor Diego Andreatta,rejonan con la jent, i parenc e i amisc de Tone che empienìa la sala te la ciasa de Comun a Vich, no l vel fèr na “apologìa” de n personaje, ma demò ne fèr sentir vejin n om che duc chi che à abù l met de cognoscer i sent amò desche se l fossa vif e apede nos.

N picol liber che no à la presunzion de fèr cognoscer dut chel che Tone Poldin l’à fat te sia longia vita, ajache – l’à dit amò Andreatta – l’é jà de etres libres de alpinism che ne met dant sia impreses sa mont, ma na publicazon che vel ne portèr dant soraldut chel che é vegnù fora da na longia ciacolèdes che Andreatta, che cognoscea Tone e sia familia da n muie de egn, l’à abù l met de fèr e de registrèr te sia vijites a Sèn Jan: chesta 100 piates scrites l’é l frut de cater egn de ciacolèdes e de 20 ores de registrazion.

É chierì de schivèr la retorica – à dit amò l’autor e diretor de Vita Trentina – ajache l protagonist enstess  no l’aessa volù. E perauter Tone aessa volù che la paroles che l me aea dit les serve a scriver n liber sul Socors, più che sun sia fegura, chel Socors che semper l’é stat anter sia pascions più fones. Desche chela di sasc, chi minerèi che ge fajea slumenèr i eies desche a n bez.

E apontin te la ciasa del Comun  tel zenter de Vich, che podessa doventèr la Ciasa de la Mont, no podea mencèr n pensier a la destinazion de chel gran patrimonie che Tone à lascià con sie Museo mineralogich: n patrimonie che merita de vegnir valorisà e metù a la leta de la comunanza.

L liber “Le stagioni di Tone. Il racconto della vita di Tone Rizzi de Poldin” ne met al luster i desvalives aspec del carater e de l’empegn poliedrich de Tone Poldin, che l se à dat jù te l’aministrazion e te la politica, te la familia e tel turism, apede che ben segur sui crepes.

N muie de parenc e amisc à tout la parola te sala: Luigi Zulian de Cuz, capostazion del Socors del Zenter Fascia, se à dit stolz de esser n ritadin de sia storia e de aer podù spartir vèlch con el; Tone Valeruz à rejonà del raport strent, beleche desche chel anter père e fi, che lo leèa a Tone Poldin, ma ence a sia femena Mimma. Chisc intervenc à metù al luster la fegura de Tone Poldin desche n om fort, fosc vèlch outa ence grovech e sobitous, segur de sé e che saea comanèr, ma zenza dubies  n om valent e datol coi amisc.

Etres recorc é rué da la fia Teresa, che à metù al luster sie esser père; dal nez Leopoldo Rizzi, che à contà vèlch fat storich; da l’assessor regionèl Giuseppe Detomas, che à rejonà de n om de comunità, bon de fèr sorapeèr la dimenscion privata e chela politica, e dal dotor Grasso, che ge à stat apede desche pascionà de crepes e dapò desche medico.

N develpai de cher a duc é ruà da la paroles del fi Giulio e de la vedova Mimma, che à abù l batiman e l braciacol de duta la sala, che à recordà e seghita a recordèr Tone Poldin con amirazion e encresciujum.  

 (Lucia Gross)