900 Studafech te Fascia

Data

17 de jené 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Enscin ai 19 de jené l’é en program l 35° Campionat talian da d’invern con la partezipazion de 123 delegazions da duta la Tèlia.


Chisc dis, enscin en sabeda ai 19 de jené, Fascia l’é la paladina del 35° Campionat talian da d’invern di Studafech. Beleche 900 Pompieres é rué te val per tor pèrt a la garejèdes de schi alpin, schialpinism, paslonch e brea. L’é adertura 123 delegazions da beleche duta la regions, con l Piemont che dombra l maor numer de raprejentanc; sobito dò vegn Emilia Romagna, Toscana e Lombardia. 

I Studafech é stac touc dant da l’Ispetor del distret de Fascia Giancarlo Pederiva e dai comandanc de duta la val che à endrezà te caserma de Vac a Pera l zenter de referiment per duta l’ativitèdes. Chisc dis passé l’é stat la iscrizions a la desvaliva garejèdes, anché jebia ai 17 de jené pea via i apuntaments ofiziai. 

Da la does domesdì te la Caserma de Vac vegn endrezà la conferenza tecnica con l’orden di enjegneres dal titol: “Lo sviluppo del GNL in piena sicurezza” e da les 14.30 taca ite la pèrt agonistica, con la competizions de brea sun Aloch. Da les 6 da sera l’é la defilèda da Piaza de Comun de Sèn Jan su per Meida enscin sun Aloch, olache sarà la zerimonia ofiziala de avertura del Campionat con l president de la Provinzia de Trent Maurizio Fugatti, l president de la Federazion trentina di Studafech Tullio Ioppi e etres raprejentanc istituzionèi.

En vender sun Aloch e sun Ciampedìe sarà la garejèdes de slalom lèrch e da la does l’é en program la endesfida de schialpinism da Cianacei fin al Refuge Salei. Da sera duc podarà tor pèrt al conzert del Cor Valfassa tel PalaDolomites de Ciampestrin. 

En sabeda ai 19, ultim dì de Campionat, sarà la proes de paslonch su la pista de la Marcialonga sul toch anter Poza e Mazin e domesdì vegnarà serà sù la manifestazion te caserma de Vac.