La Usc di Ladins

L’é stat dassen na zelebrazion fora de anter, chela stata te gejia de Poza en sabeda sera, olache l’é stat festejà i religiousc e religiouses. Ai 2 de firé, defat l’era la XIX dì de la Vita Consacrada, na festa metuda sù dal Papa Jan Paul II del 1997, per valorisèr la testimonianza de persones che à cernù apontin la vita religiousa.

Don Andrea à chiamà per chesta ocajion preves e monies rué da desvalives lesc: padre Giovanni Rossi, stat per passa 50 egn te l’America Latina, anter Argentina e Uruguay, e ades vegnù de retorn a Soraga, te sie paìsc, e padre Alberto Dellagiacoma dal Malghèr, ruà da l’Ecuador e che proprio chest an l’à festejà 50 egn da preve, i à conzeledrà la messa. Apede utèr, per renovèr sia profescion religiousa, l’é jit dapò ence 3 monies: Gisella Dellagiacoma dal Malghèr, che dò na vita te l’America del Sud ades, de 91 egn, la é ruèda de retorn per restèr definitivamenter, e la monies de la Sacra Familia di Nazareth che vegn da la Polonia e che oramai da egn les porta inant sie prezious servije te la curazìes de Sèn Jan, Suor Beata e suor Lidia. 

Suor Lidia é stata envièda da don Andrea a tegnir la pardicia, per prejentèr sia congregazion, con la fondadora Franciszka Siedliska, e sia atività, e l’é stat recordà ence suor Cirilla, che te chest temp la é te la Polonia per problemes de familia.

Ma apede a Sud America e Polonia, te chesta zelebrazion spezièla tel dì de la Candelora, averta con la benediscion de la ciandeiles portèdes dai bec, dì che ne recorda laprejentazion de Gejù al tempie, te la gejia de Poza l’é stat prejentà 6 joenec rué belapontin da la Tera Sènta.Maria, Islam, John, Nicole, Isla e George, ensema con 2 ensegnanc, i é rué chisc dis te Fascia tel chèder de la fradaa anter noscia val e Betlem. Per chesta ocajion te gejia de Poza se à podù sentir ence l son del lengaz arab, rejonà dai cristiegn de Tera Sènta, ajache apontin chisc joenec é stac envié a lejer la pruma letura e na orazion di fidei. 

Dò messa, te oratorie, i joegn palestineisc con la families fascènes che ge dèsc azet te chisc dis i à podù se magnèr vèlch ensema con i religiousc e con i volontères del Grop Miscionarie Freinademetz, e rejonèr de la senestra situazion che vif amò ades i palestineisc, seré ite e limité dai israeliegn te ogne più picol spostament e atività. 

Te chesta ocajion don Andrea à anunzià che chest uton vegnarà endrezà n pelegrinaje te la Tera Sènta, per ge dèr l met ai fascegn de cognoscer miec chesta tera maraveousa e martorièda, che é leèda a noscia val da na bela fradaa.

 (lg)