Student croda dal terzo partiment de n hotel a Sèn Jan

Data

10 de merz 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’era l’ùltima net de na setemèna biencia te Fascia, l joen era con na carantina de compagnes a l’Hotel Dolomiti.



L’azident é sozedù entorn les 3 te la net anter sabeda e domenia: n joen de 18 egn (compii l’an passà de november) l’é sutà jù dal barcon al terzo partiment de l’Hotel Dolomiti de Sèn Jan.

L student era te Fascia con n grop de na carantina de compagnes del Liceo Scientifich Vittorio Sereni de Luino, zenter de la provinzia de Varese sul Lech Maggiore, vejin al confin con la Svizera. I joegn, con vèlch ensegnant e compagnador, i fajea 5 dis su la neif: rué en mèrtesc passà per se n jir en domenia da doman. L’ultima net i à volù se goder, te hotel i à sentù che zachei fajea ac, ma nia de fora de anter. Entorn les 3 l’é ruà l’alarm, da pèrt di studenc: n compagn era sùtà jù dal barcon, na auteza de 7 metres.

I carabinieres no se à lascià fora a dèr spiegazions su chel che l’é sozedù, ma somea che no sie stat na azion volontèra del joen e che no sie colpa de zachei de etres. Na ipotesa l’é che l joen aesse volù proèr a ruèr sun n auter barcon de l’hotel.

L student é stat portà col jolier a l’ospedèl de Trent, en rianimazion: sia condizions é critiches ma somea che no l sie en pericol de vita. L’augurie l’é che l posse se la fèr cà al miec e te tempes curc.

Endespiajui i patrons de l’Hotel, che – i ne à dit – per solit no i tol te sie alberch viajes de la scoles, rua demò da vèlch an chisc gropes, vidé da n ensegnant n muie ben endrezà e autorevol, ampò rejer i gropes de joegn somea esser semper più senester.

Da pech aea troà alberch al Dolomiti la squadra di USA di joegn atlec che à tout pèrt ai Mondièi Junior de schi, anter chisc River Radamus, medaa de or de Slalom lèrch e SuperG, e i patrons era resté neto maraveé a veder che, ence dò chisc resultac che aessa dat la vertola de gregn festejamenc, chisc joegn sie se n jic bie chiec te cambra jà inant les 10 da sera.

 (Lucia Gross)