Colores e Saores: ence na cercia l'é cultura

Data

15 de merz 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
I Scizeres de Fascia à endrezà te sia senta na gustegola degustazion de bires e formaes per sporjer cultura e tradizion sora desch
Enstadì te la “Majon di Shizeres”, te la ex scoles del Forn, i Scizeres, ensema al “Agritur El Mas” à portà dant na neva sort de scontrèda. Na degustazion de bires e formaes, te na cornisc dassen particolèra, apontin chela de la senta de na Schützenkompanie.

Protagonisć i prodoc de nosc teritorie: i formaes fac dal nef “Cajelo del Mas” e la bires de la veiora tradizion todescia. A scomenzèr via l’é stat l Vize Comandant di Scizeres Manuel Adami, che desche “patron de cèsa” ge à dat so benvegnù ai ghesć. L prum a rejonèr l’é stat Michelangelo Croce, patron del “Agritur El Mas”, fi e père de Scizeres, père de Stefano, duc doi pascioné da semper de dut chel che l’é l mond di bachegn, e ben segur, ence de duta chela magnadiva fata con chi prodoc che na stala pel dèr. E coscì ruon al bel e soraldut al bon de la degustazion. 

L’é pontà via Peter Decrestina da Soraga, malghier del “Cajelo del Mas” e da egn de la Mèlga de Fascia, fajan cercèr desvaliva sorts de lat, per entener al miec con che che se fèsc formai. Dò che l’à fenì de rejonèr ge é stat dat la parola a Mirko Pederiva, ence el da Soraga, Biersommelier per pascion, col gran ensomech de averjer tel davegnir la pruma birerìa de Fascia.

Te na sala fornida sù da pezes de formai, fegn, boces de bira e sacotanta “Ègues” del Veie Tirol l’é peà via la degustazion de bires e formai, cernui aldò de saores e odores, con competenza dai gregn entenditores. Cerces su cerces con spiegazions che à lascià entener benon la gran pascion de Mirko e Peter, con domanes enteressèdes da man de tropes, dut à fat passèr dalbon en prescia l temp, desche semper canche se se got. Ma dut cogn fenir dant o dò, e passèdes doi ores e mesa, se à strutà sù chesta pruma esperienza, con batimans e complimenc per i organisadores.

Na vida desvaliva de leèr cultura, tradizions, pascions, percheche la defendura de noscia identità l’é ence chest  (ma)