Se dajon la man

Data

16 de merz 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La Coprativa Progetto 92, adum con istituzions de Fiem e Fascia, met a jir n cors de formazion per crescer te l’azet e l sostegn te la comunanza. L’é stat prejentà enstadì a Pardac.


L’é stat na sera dalbon rica de stimoi positives, chela endrezèda en jebia ai 7 de mèrz te sala del Consei de Comun de Pardac. L’era la prejentazion de n bel projet, dal titol “Se dajon la man”, nasciù per creèr na rei de sostegn, acolienza, vejinanza e didament te anter la comunanza.

Dò i intervenc de salut de la ombolta de Pardac Maria Bosin e del vizepresident de la Comunità teritoriala de Fiem Michele Malfer, per didèr l publich a ruèr ite, ence con vèlch conscidrazion e analisa teorica, te chest tem de la vejinanza, de l’azet e del volontariat sozièl, l’é stat envià Alberto Conci, giornalist trentin e dozent de etica.

Per passèr da la teorìa al concret, te la sera de Pardac l’é stat envià persones de noscia valèdes, volontères te desvaliva sociazions, a rejonèr de chel che les fèsc e chel che ge dèsc sia esperienza.

A la fin de la sera de prejentazion l’é stat prejentà n pìcol cors de formazion per chi che vel se endrezèr miec a formes de vejinanza e sostegn anter families e persones de la medema comunità.

L cors perveit 3 scontrèdes: la pruma é en program en vender ai 22 de mèrz da les 20.30 te sala del Consei de Comun de Moena. Vegnarà rejonà de che che vel dir acolienza e che che ne spenc a se averjer ai etres travers azions de didament e sostegn. La seconda, ai 29 de mèrz al Zenter Charlie Brown, te Cors Degasperi 8 a Pardac, portarà dant esperienzes e testimonianzes de acolienza e de volontariat e la terza, semper te Comun de Moena ai 5 de oril, jirà ite sun coche se pel se meter en jech, che sostegn che se pel aer e che che l’é l’acolienza de familia.

Per se enscinuèr se pel se oujer al Servije sozièl del Comun general de Fascia.

De più su La Usc stampèda de vender ai 15 de mèrz.