Katia Ricciarelli cianta per solidarietà

Data

20 de merz 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La tol pèrt a n conzert de benefizenza te teater Navalge a Moena per la sociazion “Sri Prema Sai Organization Onlus”. 

Per la pruma outa rua te Fascia la cognosciuda ciantarina Katia Ricciarelli. La soprana, anter la più amèdes del mond, portarà dant sia cianties liriches ensema al tenor Luca Canonici e l bariton Bruno Praticò compagné dal pianist Vincenzo Irelli e l lo farà per benefizenza.

L’ocajion l’é l conzert “Music for Love” a favor de la sociazion “Sri Prema Sai Organization Onlus” , vidèda da Anna Bruno e sie om Luigi Ferrante, che se dèsc jù te vèlch una de la zones più puretes de l’India, ma ence su la costes asiatiches dessatèdes dai tsunami e te lesc del Nepal e de la Tèlia tocé dal teremot. L conzert te Fascia l’à l’obietif de tor sù bonamans per didèr fora la jent te chisc lesc. Al conzert, en program te teater de Navalge en sabeda ai 23 de mèrz da les 20.30, se pel esser prejenc ence da dalonc: con la scomenzadiva “Sporc na poltrona” se pel lascèr n post prenotà a chi che volessa tor pèrt. Per domanèr “n envit su donazion” se pel chiamèr o manèr n messaje al 333 3374768 o na mail a annabruno.neworld@gmail.com. La donazion é a oferta ledia: chi che no pel dèr na bonaman pel durèr l post sport da n amich dalonc. 

De più su La Usc stampèda de en vender ai 22 de mèrz.

 (mci)