Aisciuda Ladina… en familia

Data

20 de mei 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’Aisciuda Ladina 2019 à portà dant desvalives momenc leé a la familia. Dò la avertura ofiziala l’é stat la prejentazion de n nef liber e l domesdì de jeghes te caserma di Studafech de Vac.


“É inom Luca, é unesc egn. É fat n lonch viac con na valisc piena de sasc. La strèda va inant. No sé se troaré troes erc, che va en ju, utèdes o pianures. Ge vae inant, voi saer.”

Coscita fenesc via l liber e coscita à fenì via ence Daniele Chiocchetti, che ensema a Loreta Florian l l’à interpretà. L’é l nef liber dal tìtol “La pazienza di sasc” che é stat prejentà en jebia ai 9 de mé te sala Heilmann del Museo ladin de Fascia tel chèder de l’Aisciuda Ladina 2019.

“La pazienza di sasc” l’é n liber nef per coche l vegn scrit e portà dant, e chest l’é stat belapontin l prum pensier de la scritora Ierma Sega e de la dessegnadora Michela Molinari: fèr n liber che deide pìcoi e families a viver la malatìa de n genitor e a ge jir dò al vièl de la cura con consaputa e speranza.

Familia, fies e speranza l’é i trei fii rosc che lea l liber e sia prejentazion tel chèder de l’Aisciuda Ladina da man de l’Ofize servijes linguistics e culturèi.

Tel chèder del gran event che se à dejout te Fascia l’é stat ence “L’aisciuda de la familia”, n domarena de jeghes a squadres anter families. A endrezèr la scomenzadiva en vender ai 10 de mé aló da la caserma di studafech de Pera l’é stat la sociazion coprativa Inout ensema con Sabrina Rasom e l staff di Servijes linguistics, i bec de Circensema e amò de autres scolees.

Duc i bec de la scolina e de la populères à podù tor pèrt dessema ai genitores, a frèdes, giaves e bèrbes e a duc chi che à volù. N confront generazionèl metù en jech, metù sul jech: la squadres se à godù con jeghes da n’outa e con jeghes da anchecondì.


De più su la Usc nr 19 stampèda ai 17 de mé  (mci/dv)