Sozietèdes portamont: investimenc e sodesfazion

Data

22 de mei 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Sitc, Ciampac, Doleda e Catinaccio à aproà si bilanzes. Chest invern l’é jit amò ben, a despet de n temp meteorologich nemich, e la sajon ecezionèla de l’invern passà à portà de bogn resultac 

Coi monc amò zis bienc e piens de neif, no l’é senester rejonèr amò de invern. Na sajon chest an feruscola e spes fora de calandèr. Na sajon tachèda che piec no se podea, co la “tempesta Vaia”, dapò la neif che no se à fat veder enscin l’an nef, n gran vent, n bel soreie de firé, n burt gonfet de mé. Ence se dut chest l’é stat l’invern 2019, amò se pel dir “ la é jita ben”. A la jent ge sà bel jir coi schi e ge pièsc vegnir te la Dolomites: la calità la é ben spartida fora te vigni setor, l’é stat fat investimenc tant a livel de strutures che de infrastrutures. E l’é proprio la parola “investimenc” che sotrissea più outes l president di impianc portamont e vizepresident de la Sitc Daniele Dezulian: “se fermèr e se sentèr jù l’é n eror che no se cogn fèr. La Val cogn aer fiduzia, i investimenc paa e l’é l met per se tegnir n bon post tel marcià turistich, olache la concorenza la é vigni sajon maora”.

L resultat complessif di impianc portamont de Fascia segna n manco 1,6%. L’é da dir però che chest l vegn fora no demò da n invern dalbon particolèr, ma ence da numeres che se confronta con chi de la sajon da d’invern 2017/18, la miora di ultimes diesc egn.

L’é stat proprio i resultac di bilanzes seré su ai 31 de dezember 2018 a vegnir porté dant ai sozi de la sozietèdes Sitc, Ciampac, Doleda e Catinaccio ti dis passé. La sajon da d’invern 2017/18 l’à tacà polito e la é jita inant amò miec: i passajes da jené fin de oril i é stac 8.851.600 e l’é stat encassà passa 20 milions de euro, 20.877.000 per esser prezisc: respet a l’an dant, n +7,1% e +10,6. Dalbon  n gran ejit de grazia proprio ai investimenc fac, che ge à dat neva gaissa e nef luster ai impianc de Fascia, al Skitour Panorama. Se la forenadoa de Doleda jà da sobito à moscia sie valor soraldut per la viabilità, percheche per i ghesć de la bassa val l’é più sorì peèr via da Poza, la neva cabina che va sun Ciampac (averta de dezember del 2017) e la neva sentadoes che da Pera porta sun Ciampedìe ge à dat l met ai schiadores de goder ence de raions no demò dintorn l Sela, ma autertant bie.


Troède l'aprofondiment su la Usc nr 19 stampèda ai 17 de mé

 (FD)