La Usc di Ladins

Se se binarà ilò da L Crep nta Col chesta sabeda per inaugurà la statua de corten, opera del scultor trevijan Valentino Moro, che la vol regordà l dejastro de Vaia. L é passà debota doi agn da chela not dei 29 de otobre del 2018 che degugn de chi che eva chilò se desmentiarà; i laor per netà su i bosch i va inavant ma no se sa canche se podarà dì de avè finì e chisà se chi che liez i podarà tornà a vede i bosch come che i eva davant. Ma l é ntel ester de la natura no ziede gnanca ntei momenc pi trisć e jì inavant a vive contra dute le dificoltà: e sta nuova statua, che l à inom “Sfida” e che la mostra n pico lares che sponta da un grant rebaltà, co le raisc per aria e i ram spacai via, la vol ester proprio chest, na sfida contra dut chel che va stort e na demostrazion de la natura che no la muor e che la torna a nasse.

L’apuntament l é donca sabeda ai 10 de otobre da le 11:00: darè n saludo n mujica de la Banda da Fodom sarà l moment dei intervenc del Capocomun da Col, de la curadora del proget Loredana Gava, de le autorità e del scultor Valentino Moro e a la fin la benedission de la statua. La moderazion la sarà de Denni Dorigo, diretor del Istitut Ladin Cesa de Jan: darè la zerimonia vignarà sporta a duc na marenduola. Ajache l é sempre l pericol del Covid-19, resta l obligo de mascherina e distanziament: se pol confermà la propia prejenza al Comun da Col (0437 720004) o a l’Associazion Turistica de Col (3476189044) fin vender ai 9 da misdì.

Martino Pezzei