La Usc di Ladins

De pi de 250 domande presentade per ció su la gestion del Rifugio Nuvolau darè che l gestor storico per 47 agn Mansueto Siorpaes l à lassé via, l CAI de Anpezo l à dezijo de azetà chela de la jovena anpezana de 27 agn Emma Menardi Diornista: i tocarà donca a ela daurì l rifugio st’istà, darè i laor che la sezion de CAI farà st’ansuda per l mete del dut a norma.

Chel sa La Lastia (come che i dis chi da Col) l é l rifugio pi vege de le Dolomiti: fat su ntel 1883 con na donazion de n colonelo de Dresda col inom de Sachsendankhütte (rifugio de ringraziament del Sassone), dejemà da le bomba intan la Prima Guera e po refat su, resta un dei rifugi pi panoramici e incia pi saurii da arjonje de le Dolomiti, semper pien de jent de d’istà incia se no l à zerto i lussi che se ciata ntei rifugi de ades.

Martino Pezzei