La Usc di Ladins

»La mont la merita respet« l é stat scrit nte ogni cianton sti di. Prove a declinà sta frase, che mi a dì l vero no ai ncora capì, e de la adatà a na cuestion che sti di la é propio de atualità a Col. Elo da impermete o no de ristruturà l vege albergo Enrosadira sul jof de Giao per l fà deventà n albergo de lusso con setanta ciaune? Elo, chesta, na cuestion che à a ce vede domà con nvalgugn interes de privac, o puoch pi, o elo inveze na cuestion che toca duta la coletività de chi che, residenc e no domà, i vol ben, i cugnes e i frecuenta l jof de Giao? Mi no crede che se posse dà na resposta a sta domanda senza prima riflete sun en aspet, che à a ce vede co le noste Dolomiti, che nte sti agn l é vignù fora n maniera semper pi importante: se da na banda le Dolomiti, come ogni auter teritorio, i é aministrade da le comunità che ilò le vif (ntel nost caso, perauter, comunità semper pi minude e semper pi debole), da chel autra chele medeme Dolomiti le ven oramai vidude e sentude, e donca cusì i é, come na calche sort de bene comune de duc chi che, a vario titolo, come che ai dit sora, i vol ben, i le frecuenta, magari a jì a caminà de d’istà e dedinvar coi schi o co le ciaspe. Se cusì la é, no l é degun dubio che n intervento cusì invasivo come chel che l é sota aprovazion sul jof de Giao – anter dut l rest, con soldi dal estero e na ciara intenzion domà de fà soldi – l à da passà da l’aprovazion no domà del Consilio Comunal de competenza ma incia de chela comunità pi granda che dijeve sora, chela che sent le Dolomiti – sua beleza, suoi panorami, chela simbiosi duta particolare anter la natura e la jent che ncora ilò la vif – come n bene comune che no se pol i dà n valor. Sto slargé fora l numer de chi che pol dì la sua e dezide l servirave incia a lieje e interpretà nte duta n autra maniera dut chel gran benester che ven imprometù e che, a dita de valgugn, l intervento sun Giao l fese ruà a la comunità locale. Dejine de agn de consumo, a le ote alegro, del nost teritorio e na maniera no romantica de vardà a la realtà del didancuoi i avarave da ne fà capì che l turismo che se magna fora dut l é la roba pi pericolosa che posse suzede a chi che à dezijo de restà a vive sa mont; che, a la fin, l dighe a mo de ejempio, no à tan de senso ciatà da dì per l giusto azent sun na nosta parola ladina, e ciamà chest n ejempio de salvaguardia de la propia identità, e l di darè svende per na pipa de tabach l paesagio material, simbolico e de valori che le generaziogn davan da noi le n à consigné e che noi – chest l é l merito che avessane da rivendicà – aon l dover de lassé autertant pien de tara, de simbui e de valor.


Vincenzo Agostini