La Usc di Ladins

No la sarà come la Pasca del 2020, ma incia chela de sto an sarà na festa desferenta da come che sion ujai: se staota la funziogn religioje la sarà zelebrade e la jent la podarà partezipà, resta ncora grosse limitaziogn che no impermet de se ciatà con amizi e parenc come ne sarave bel fà. No ne resta che fà ncora na ota n sacrifizio e ingiotì sto bocon agher, ncora un, nte la speranza che siebe l’ultimo e che po la strada per na vita pi normale la siebe derta e saurida davan da noi: ma regordon incia che »sacrificio« l ven dal latin e vol dì »fà sacro«, no l va vidù come na rogna da soportà o valch che l é da le fà dute per l tignì dalonz. Cujì chel che se sacrifica per sua famea l fas sacro l raporto con chi de la famea, chi che se sacrifica per l laor i fas sacro l suo raporto per l laor, e un che no se sacrifica per ste robe l n’à n idea ben strana: nta sta maniera dute le rinunzie che fon le fas pi forte nost liam con chel che ne stà a cuor.
Alora inveze de stà a pensà domà a noi e a ce che n’é stat ciot provon a pensà a chi che per colpa del Covid i é finii n ospedal, magari incia tacai nte le bombole del ossigeno parceche no i ven pi l fie, a chi che senza laor nte le zità i fas la fila per ciapà valch da magné da la Caritas e da la associaziogn de volontariat, e soraldut a chi che per colpa de sta strazaria i à pardù la vita: pi de zentmile persone domà n Italia, zentmile crosc che incia canche sta storia la sarà finida le restarà per semper nte la nosta memoria. Ma no se pol se fermà a vardà domà indarè: col aiut dal aut de nost Signor e con ntel cuor la speranza e la volontà de se dà da fà per n mondo pi bel vardon inavant a le stemane che vignarà.


Martino Pezzei