La Usc di Ladins

Vender 30 de auril, da le 18:00, l'associazion "Bellunesi nel Mondo" e l'Istitut Cultural Ladin Cesa de Jan, en colaboprazion co la "Biblioteca delle migrazioni Dino Buzzati", el "Centro Studi sulle migrazioni Aletheia, el MiM Belluno e Radio Abm i prejentarà online su sul canal Youtube e su la plata Facebook de l'associazion "Bellunesi nel mondo" el liber "Emigrazione dalle Dolomiti nel corso del Novecento. Storie di esodo da Colle S.Lucia. Livinallongo e Rocca Pietore." La mont la para deméz o la tira damprò a seconda de le oportunité economiche che ven sporte prò a suoi abitánc. Ite per el '900 la jent l'é plucheauter sciampada, l'a arbandoné la mont. E chëst suzede ence encuoi, sebénche vegne fat na valoriazion turistica e mediatica de le Dolomiti "patrimone del Unesco. Nte la publicazion ven auzé fora aspéc emportánc de l'emigrazion da le comunité de Còl, Fodom e La Rocia ite per el '900. Lëtre, documenc, testimoniánze le dáida a mëte auna na storia fata en gran pert de laour, patimenc, sacrifizi, nte la speránza den miou davignì. Entervignarà Oscar De Bona prescident de l'associazion "Bellunesi nel Mondo", Denni Dorigo diretor del Istitut Cultural Ladin Cesa de Jan, Paolo Conte storich, Luciana Palla autrize del liber. La prejentazion vignarà moderada da Dino Bridda diretor del sfoi "Bellunesi nel mondo".