Le critiche de la consiadëssa de mendránza per en progét su la cultura ladina che i trei comuns a mossù refudé
El progét el se clamáva, adés toca douré el verb al passé, »El colegament de le Dolomiti« e l eva sté prejenté ntel 2012 dai trei comuns de Fodom, Còl e Ampëz per ester finanzié dal Fond Comuns de Confin. Se tratáva den progét da ben 300 mile euro, coordiné da Istitut Cultural Ladin Cesa de Jan, che pervedáva deplù scomenciadive a sostén e promozion de la cultura ladina nte le trei comunité da Souramont en colegament co le autre val ladine del Sela. Ntra chëste ativité de lengaz e cultura ladina da fé d’isté via (64 mile euro), deplù ativité de integrazion ntra le comunité ladine come le »Ladiniadi«, de sport, mujica (35 mile euro), el concors Mendránze en Poejia (15 mile euro), en foliet informatif (8 mile euro),
mostre tematiche su usánze e guánc, berstot mujicai a de teater en ladin (75 mile euro), na mostra tematica su la Gran Viera (38 mile euro), rizerche linguistiche e de toponomastica con publicazion spezifiche (45 mile euro) e per i media ladins (20 mile euro). Na bela bocia de aria per l’ativité del Istitut e na grana oportunité de envié via scomenciadive, souradut dedicade ai jovegn, per renforzé la cugniscënza del lengaz ladin, l’identité ladina ma ence per s’enconté e se cugnësce ntra le cinch val. Ma coche l’é stada o no l’é stada, davò diesc agn el progét l é resté demé su la cherta.
Deplù te la edizion stampeda dl 26 de november.ABONAMENT 2021 70,00 € por la Talia – INFO
aministrazion@lausc.itABO E-PAPER
https://lausc.it/abonament-e-paper-la-usc-di-ladins
