La Usc di Ladins

Co ela la situazion del Istitut Cesa de Jan veduda dai ogli del Diretor?
Scomenciásse col dì che l Istitut l é na istituzion sana, portada nnavánt con pascion e con gran rigor, siebelo dal pont de veduda economich-finanziar, che aministratif. La pascion la ven da duc i colaboradous: duc, dal prum al ultim, i laora nte Istitut percieche i crei e i mët l cuor nte chël che i fesc. Chëst l é l motor del Istitut. E po, ajache al diretor speta la responabilité economich-ami­nistrativa, ie tegne a dì che, ence se l Istitut l é n ent de derit privat, l ven gestì coche se fossa na istituzion publica, spo vigni euro che và o che ven, se sà ejato l co, l come e l percié. Per dì: ven fat na determina ence se l é debujen de compré n lapisc, spo duc, nte vigni moment, sà ci che l é sté spenù, ulà e l percié.