La Usc di Ladins

Nce chëst ann va i Trëi Rëisc da cësa a cësa a purté la benedescion per l ann nuef, l ncëns y a damandé na dunfierta per passa cënt proiec caritatifs che la Jungschar sustën sëura dut l mond. Chësta tradizion vën fata te dut Südtirol

I Trëi Rëisc ti va do ala stëila, che ie l simbol de na gran vijion: n mond zënza fam y patimënt, ulache uniun possa viver, dëni de vester nasciù. I Trëi Rëisc mostra cieche ie mpurtant: a cialé sëura cunfins geografics, etnics y religëusc se mpeniei contra la iniustizia y la puertà, per n mond plu valif y da sté bën. Rengrazion bele danora duc per si sustëni y per la bona man.

Un de cënt proiec dl 2020: Scoles tl Ecuador

Ulon ve prejenté un di proiec che vën sustenì chëst ann. Tl Ecuador iel gran desferënzies tla cualità de vita danter ziteies y pitli paejes periferics. La jënt che viv te de pitli paejes ie scialdi puera, mé puec à l muet de pudëi jì te na scola scola privata. Nce la scola secundera tlameda "Colegio" costa, nia sciche la scola elementera che ie debant. Sëuraprò iel mo da paië l material de scola, l’uniform, n pert i maestri, la curiera y la marënda. Per l mantenimënt dla nfrastrutures y i maestri ne dà l Stat degun cuntribut. Per nëus ie la furmazion zeche de tler. Nsci ti juda la Jungschar for gën a paejes ulache chësc ne n’ie mo nia nsci.
La dunfiertes vën perchël mandedes a doi scoles dl Ecuador: la scola "U.E.F. Padre Ricardo Nardi" y la scola "Escuela Especial – Mons. Maximiliano Spiller". La prima scola à 700 sculeies y sculées dai cinch nchin ai 18 ani. La scola ie tl Amazonas, ulache l pluev uni di. Cun l passé dl tëmp à l tët scumencià a stravé. La scola à debujën de tlasses nueves y de cumedures dla nfrastrutura.
La segonda scola, tla zità Tena, ie na scola per mutons y mutans cun bujëns spezifics. I mutons cun deficulteies de udëi y audì o d’autri mpedimënc à na gran fertuna a pudëi jì a scola. Cun i cuntribuc di Trëi Rëiesc puderà la scola se njenië materiai didatics che mancia al mumënt.


Valeria Bernardi


Foto: I Trëi Rëiesc a Urtijëi (foto de archif 2014).