La Usc di Ladins

Da coche scrij l ambolt de Urtijëi Tobia Moroder n mierculdi ai 11 de merz da marënda sun si plata facebook, "vëniel da śën inant fat cuntroi da pert dla forzes dl ordn pra uni auto che va ora dla valeda". -Mpo: "Ne dausson śën nia vester grames"


L ambolt Moroder: "Lecorde a duc che n daussa mé se muever per rejons de urgënza y sce n à pea l'autodetlarazion ududa dant, che n possa desciarië ju nce dala plata internet di Chemuns. Nce i spustamënc danter i chemuns pòssen mé fé per rejons de lëur, de sanità o de d'autra rejons de urgënza. Ne dausson śën nia vester grames, al mumënt ie la situazion mo sot a cuntrol te Südtirol, ma MESSON śën duc deberieda tenì ite la regules scrites dant sce ulon ressolver te puech tëmp chësta situazion nia saurida, dantaldut te nosta valeda, ulache l dëssa vester deplù caji di cater cunfermei ufizialmënter. A livel de valeda ons perchël nce fat ora de ti cunsië a duta la butëighes (ora de chëles che vënd roba da maië y apoteches) y ala bars de tenì stlut ti proscimi dis, per schivé mo deplù l cuntat danter la jënt." Nscila l ambolt Moroder, che fina via cun la cunscidrazion y l nvit: "L ie na emergënza coche ne la on mo mei vivuda, che se damanda l sforz y la bona ulentà de uniun de nëus! Prëibel tenion adum y dajon nosc contribut!"

David Lardschneider


Foto:

L ambolt de Urtijëi Tobia Moroder: "Prëibel tenion adum y dajon nosc contribut!"