La Usc di Ladins

"Che tla Talia ie tan che dut dsarà su, cumporta na gran melsegurëza pra truepa jënt. La cumenanza à messù mudé si ritm de vita da uni di, l ie unì dat dant mesures che strënj ite dassënn l’autonomia dl singul. Suvënz iel la cuseguënza che trueps se sënt lascei da sëui, te na situazion nueva che i fej unì melsegures y sentì sot a prescion. N valguni à na strutura persunela che i porta a se tré zruch y a schivé dut y duc, d’autri ne n’ie al incontra nia boni de azeté la regules y la sëides metudes su y à na reazion mpulsciva, ajache i se sënt tuchei te si autodeterminazion. Truepa emuzions ne lascia nia pro reflescions drëtes y dsera ite la facultà de ti cialé tl mus ala realtà y a avëi na vijion sun mesura dla situazion."

Chësc scrij per la Camera di Psicologs de Südtirol l psicologh de Sëlva Edmund Senoner y la presidënta Sabine Cagol.

Inant: "Co dëssi pa tenì ora a sté a cësa te familia, sce da sëira ne possi niancanó plu jì te ustaria? Cie ti diji pa a mi mutons, n con’ de ciuldì che la scola ie tan giut stluta? Co dëssi pa me cumpurté sce na persona che me fova daujin ie morta y ie ne posse niancanó jì ala supeltura? - Per giapé respostes y sustëni pieta picologs/ghes y psicoterapeuc/tes n servisc spezialistich, acioche la jënt posse ruvé a avëi inò pazienza y crëta y posse ruvé a n cumpurtamënt resiliënt, che uel dì che n posse se refé dal trauma de chisc dis? Davia che l coronavirus ie n fenomenn coletif, messons nce cialé de nëus te na maniera coletiva. Per arjonjer chësc vàl debujën de solidarietà cun chiche ie tucà y de crëta tla mesures dates dant."

Da pert dla Camera di Psicologs ti vëniel metù a cuer ala jënt de se nuzé, sce l va debujën, dl servisc psicologich y psicoterapeutich, ai/ala psicologs/hes y ai/ala psicoterapeuc/tes de se tò a cuer la tëmes dl singul: "Nëus psicologs/hes savon che da na tel situazion straurdinera pòssel sauté ora n gran pëis psicologich, pra un o l’autra, y ulon perchël pité aiut, per vester boni de cialé de sé y per vester boni de se cumpurté sun mesura. L ie tler che te na tel situazion particulera pòssen scumencé a dubité, che la porta a ngrandì mo deplù la tëmes, a na maniera che n ne n’ie nia boni de se n desgatië da chësta tëmes. Ti meton a cuer a nosc/nosta colegs/hes te praxis liedia y tl servisc publich, de ti dé priurità ala dumandes de chiche tol su cuntat, ma de avëi sambën cuntat diret mé te na situazion particulera de bujën y prëscia, scenó de cialé de mantenì l cuntat tres telefonn y tres via telematica. La finamira ie chëla de fé a na maniera che l vënie schivà che l saute ora n svilup patologich pra persones melsegures y melseguredes, cialan de ti judé a arjonjer na si stabltà. Plu nfurmazions iel da abiné sun la plata internet dla Camera di Psicologs de Bulsan y dl "CNOP - Consiglio Nazionale Ordine Psicologi"."

David Lardschneider

FOTO:

I espunënc dla Camera di Psicologs de Südtirol, la presidënta Sabine Cagol y Edmund Senoner.