Coronavirus: "Gherdëina se tën al’urdenanza"

Data

13 de merz 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Da coche conta l ambolt de Sëlva Roland Demetz fej la jënt de Gherdëina dassënn al sënn, se tenian pra la urdenanaza de sté a cësa y de se muever mé per i puec caji preudui. Demetz mpo cun festide: "La piza dla nfezions muessa permò unì arjonta"

Da n mierculdi incà iel i cuntroi da pert dla forzes de polizia y di polizaies de Chemun, che se tën a chël che l ie unì fat ora a livel de Guviern zentrel n con’ dl pudëi – o ne pudëi nia - se muever, cun auto o a pe: "La jënt, tan che duta, tën ite chël che ie scrit dant, te duta la veleda. Tl prim fòvel iusta vel’ un che ie unì tenì su, che ne fova nia a post, plucheauter vel’ jëunn che ulova jì da si nevicia te n auter chemun." Nscila l prim ressumé positif da pert dl ambolt de Sëlva, che lauda y rengrazia la populazion de duta Gherdëina per si cumpurtamënt da fundamënt y de respet dla regules.

"Mpo iel mo vel’ un che s’la tol ala lesiera, se muan mpo, mé per dì unian da n auter chemun te Sëlva a jì cun la peves," dij Demetz.

L ambolt ne vëija nia n problem sce n va a spaz te si chemun, cun l cian, o nce cun la peves: "Ma n muessa jì da sëui, stajan dalonc da pusciblteies de regrupamënt. Sce l ie pona doi de familia che va a spaz iel un n cont, pra doi cumpanies iela bele autramënter, chëla ne va nia."

Demetz fej tlo la desferënzia danter na zità y paejes coche i nosc: "Davia che l ne n’ie degun turism al mumënt, sons pu puec, iusta un per piz, sce jon a spaz ora per nosta cuntreda."

L ambolt de Sëlva ie cuntënt cun l cumpurtamënt dla jënt, ma l dà tl medemo mumënt da lecurdé che "la piza dla nfezions ne n’ie mo nia unida arjonta. Chëla arjunjerons te n’ena. Pona sperons che la posse inò scumencé a jì de reviers, che manco jënt se tache. Ma propi perchël ti mëti a cuer a duc de sté inant a cësa, coche da urdenanza. Sce tenion adum, duc y dutes deberieda, sons’a bën boni de n unì dainora, da chësta situazion!"

Demetz conta che per ël persunalmënter iel ënghe stat n’ena bëndebot pesocia, l ie stat n valgun dis che l telefonn jiva tresora, "che ësse abù debujën de trëi telefonns. L fova pu y ie da mëter n droa duta la urdenanzes stateles y provinzieles. N generel muessi dì che é abù y é inant l gran festide che la jënt posse se taché, te na mesura y cumpëida massa granda. Stajon a cësa!"

David Lardschneider

FOTO: L ambolt de Sëlva Roland Demetz.