La Usc di Ladins

Co vëija pa i jëuni chësta situazion particulera dl coronavirus?

Son iusta senteda pra viere de mi majon y cële ora: l ciel ie brum, i uciei cianta y scibla y l’ansciuda vën bel plan inò docà, nce te Gherdëina. Dedora seméiel dut normal, ma l ie mpo mpue’ autramënter. Messon sté te cësa nchin che duta la pandemia ie passeda. L ne n’ie nia saurì, ma l tëmp passa y cun l tëmp nce i pensieres che n à.

Tl prim nia boni de crëier a cieche l suzed iusta
Canche dut cant à scumencià y n audiva for deplù de chësc virus, ne fòven mo nia drë’ boni de crëier a cieche l suzedova tl mond y dantaldut tla Talia. Sambën che n messova se rënder cont dla situazion, ma n ne fova mo nia nia boni de se nmaginé che la situazion ëssa pudù unì tan grievia. Śën sons belau duc canc dsarei ite te cësa y cialon de fé passé l tëmp l miec che la va

Università da cësa
É la gran fertuna che posse mo scuté su inant la lezions dl’Università. La Università Liedia de Bulsan à bel snel, canche l ie unit ora la ublianza de sté a cësa, metù a jì la lezions online. Nscila pudons nëus studënc y studëntes scuté su l professëur, la professëura. L vën fat videos, y oradechël pudons monce ti cialé ala PowerPoints di nsenianc. L ne n’ie nia tan bel sciche a jì de persona tl’università, ma l ie bel che l nes vënie mpo garantì l mesun de istruzion.

Duc se ncunforta inò sun la pitla roba
Sambën che ulessan duc jì ora de cësa, dantaldut ajache son jëuni. Nëus ulessan jì a fé festa, ulessan jì dedora, viagë, udëi cumpanies y s’la rì. Mpo, l nes fej nce bon a sté n iede dedite. Ma nia mé a nëus jëuni y jëunes, n generel ala jënt d’uni età. On l mesun de pensé do a cieche ie mpurtant per nëus tla vita, de se fé n cheder de coche ulon che la vede inant. É rujenà cun truep cumpanies: duc canc se ncunforta inò sun la pitla roba. Sun l jì dedora, jì inò tl’università, jì a bever n café deberieda, y l plu de dut sun l cuntat danter nëus, coche la mbracedes cun chëi che n à gën. Perchël aspitons śën l di ulache pudon inó viver inant nosta vita da uni di, cun mo plu legrëza. Che nëus duc messon sté a cësa ie nce na bona per la natura: la se refej inó, ajache l ie manco mpat ambientel da pert dla persones. L’ega ti canai de Unieja ie tlera y l ie monce delfinns tl Port de Trieste, ajache l ne’n ie nia plu berches.

Tla edizion stampeda di 20 de merz iel mesun liejer cieche dij Tobias 18 ani, Annika 20 ani, Samuel 21 ani, Valeria 20 ani, Klaus 21 ani, Maria 20 ani, Paolo 20 ani y Katharina 20 ani.

Julia Lardschneider

FOTO: Dessëni de jëuni y jëunes, deberieda, cuntënc de pudëi s’la ciaculé, dedora (dessenà ju da na fotografia abineda sun istockphoto).