Varì dal coronavirus

Data

23 de merz 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La parola a na persona de Gherdëina che ie varida dal coronavirus: "La situazion te spedel de Bulsan ie propi scialdi pesocia!" Na ntervista:

La Usc: Ulà Ve ài pa menà?
NN: I me à menà su tl repart de malaties nfetives, te terzo partimënt, dl spedel de Bulsan. Me é bën sperdù. Ma pona ie unida na duturëssa che me à dit che l tampon ie neutrum, ma che i muessa fé da nuef la analises. Da dedò me ài fat na terapia contra la fiëura. I à scumencià a me dé flebi uni di. Te cater dis fovi pa bën varì, perchël. Son stat passa n’ena alalongia te spedel.

Y pona ve ài mandà a cësa.
Sci, i à dit che son varì. Son l prim che i à lascià jì dal spedel de Bulsan, da canche l ie unit ora l coronavirus nce da nëus, te nosc raions. Do mé jiva pa bën mo un a cësa, n chël di. Ntant sons a cësa, ulache muesse sté n carantena, doi enes alalongia.

Co ie pa stata, co ie pa chësta esperienza per Vo?
N generel muessi dì che l me à propi fat gran mprescion, de coche ie la situazion te spedel de Bulsan, ma ies’a mat! I me l’à pa io cumetuda: "Dì pa a duc a cësa che i ne dëssa pa io no jì ora de cësa. La jënt ne se rënd nia cont te ce situazion che son!" Chësc me à dit i dutores y la nfermieres, i me à propi fat su n tel cë, de chësc viers. Ma eh, ntant sons tlo a cësa, sté bën bën, son mo n carantena, per de ndut doi enes (mo diesc dis da ncuei lunesc inant, ndr.). Son da sëul. Per fertuna ons n cuatier sëuraprò, ulache ie posse sté da sëul. Mi fëna me porta l maië, che la me lascia dan porta. Ie vede ora a me l tò. Ntant feji cieche i me à cumetù, y tan inant che la va ti vedi do a mi hobbies. A dì dl talian, "non tutto il male vien per nuocere," nia dut l stlet ne vën per fé mel. La va for de mantenì l otimism!

Cie ulëis’a ti dì a chiche liej La Usc di Ladins?
Tenide dur, tenion dur. Y io sté a cësa!

La ntervista ntiera sarà da liejer tla edizion stampeda di 27 de merz. 

Ntervista de David Lardschneider


Foto: L spedel de Bulsan (foto de Provinzia Autonoma de Bulsan, news).







Galaria retrac