Coronavirus y l sustëni dla Crëusc Blancia

Data

30 de merz 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Una dla urganisazions de majera mpurtanza te chësta enes de coronavirus ie la Crëusc Blancia. La Usc di Ladins à rujenà cun Matthias Runggaldier:

"La situazion de coronavirus che à scumencià tlo da nëus ai prims de merz fova y ie zënzauter na situazion nueva. Tl prim cumandòvel "l cajin", ajache ne se assan mei aspità che l sautëssa ora tran aslune tan de caji de coronavirus. Ne savan tl prim nia co se cumpurté. L fova na situazion che jiva sëura chëla che ie stata nosta furmazion de lëur y de ntervënt. L ie unì fat fai, sibe dal 112 che da nosta pert. L nes manciova na struturazion nce da sëurajù per pudëi lauré inant te na maniera profesciunela, dantaldut per ti dé segurëza ai lauranc y ai ulenteres." Nscila l capoturno dla sezion de Gherdëina dla Crëusc Blancia Matthias Runggaldier: "Savan bën, nce y bele tl prim, coche messon se furnì, cun la tutes blances, cun la mascra FFP3 dal filter y cun udleies aldò y la manëces, ma ne savan mo nia da recunëscer avisa i sintoms per dì che l se tratëssa o manco de n cajo de coronavirus. Mé per dì, sce un ova o mé fiëura o mé la tos, pona ne savans nia da dì na drëta. Do n valgun dis iel pona unit ndicazions tleres, cun n cunzet. Danter l auter savans pona che sce zachei ova abù cuntat cun zachei che ova l coronavirus, o che l ova fiëura, tos y mel de cë pona pudòvel bonamënter avëi l virus. Puec dis do l scumenciamënt fova dut plu struturà, pra la cherdedes dl 112 nes dijovi ntant avisa canche l se tratova de n ntervënt per coronavirus, ajache i fajova bele na anamnesa da dalonc aldò de criteres y dumandes avisa."

Ulenteres y cunlauradëures dla Crëusc Blancia de Gherdëina
De ndut iel pra la Crëusc Blancia de regula 80 ulenteres. Ma te chësc mumënt ne n’ie nia duc che fej pea i ntervënc. Runggaldier spiega ciuldì: "L ie bën da udëi ite pra chëi che à jënt de tëmp a cësa y ne se vëija nscila nia sëurora, ajache l ie l pricul de ti taché l virus a chiche ie a cësa. Per chësta y d’autra gaujes iel ntëur ai mec che juda pea coche ulenteres, al mumënt. N valguni, mpo na bela cumpëida, ie jic te Cësa de Paussa a judé, ulache l mancia lauranc, che se à n pert amalà, y ajache l ie n gran bujën, te Cësa de Paussa, ulache l ie nce da coche savon caji de coronavirus pra la jënt de tëmp." Set ie i cunlauradëures dla Crëusc Blancia de Gherdëina, sëuraprò n iel una che fej l servisc zevil. L caposezion de Gherdëina ie Oliver Kostner, che à la ncëria de ti sëurasté ai ulenteres, l caposervisc ie Hermann Delucca che ie a cë dla pert plu burocratich-aministrativa y logistica, capoturno ie Matthias Runggaldier; ël cuordinea i lauranc y i ulenteres cun i orares de servisc y i ntervënc.

L servisc de cuntrol y de cumpré ite
Cun la sezion de Tluses dla Crëusc Blancia y la Prutezion Zevila de Südtirol va la Crëusc Blancia a fé l servisc pra la lueges de cuntrol, ulache l ie nce i carabinieri y la polizia. La Crëusc Blancia pieta nce l servisc de jì a cumpré ite tla butëighes, roba da maië y de prim bujën, ma nce medejines tla apoteches.

Situazion psichica pesocia
Cun Matthias Runggaldier ons nce rujenà dla situazion psichica, che ie dessegur particulera, te chisc dis.

Ala/ai ulenteres y ala/ai cunlauradëures dla Crëusc Blancia de gra de cuer per si servisc tan mpurtant!

L articul ntier ie da liejer tla edizion stampeda ai 3 de auril.

David Lardschneider

FOTO: Pra n ntervënt cun la tuta, la capuza, i udleies y la manëces.