Prof. Edgar Moroder, adio assudëi!

Data

03 de auril 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L prof. Edgar Moroder, che nes à danz lascià massa abenëura, vën lecurdà dala istituzions, da persones dl mond dla cultura, dla scola y di mass-media.

Union di Ladins de Gherdëina y Museum de Gherdëina
La Union di Ladins de Gherdëina y l Museum de Gherdëina lecorda "cun recunescënza" Edgar Moroder, che ie stat cunselier, vizepresidënt y presidënt dla Union di Ladins de Gherdëina., cunselier y curadëur dla sezion naturalistica dl Museum de Gherdëina: "La truepa nrescides, la publicazions, i referac y i articuli per l Calënder de Gherdëina ie na arpejon de gran valuta per la cultura ladina che cialeron de stravardé y de purté inant. Do avëi mo dan Nadel dat ora l liber dla dlieja de Sant Antone cun la fotografies de Wolfgang Moroder, se dajòvel ju cun la storia di Rec, opra che ti stajova dassënn a cuer. Si gran pascion y si legrëza per la cultura y la storia de si luech y si valeda dëssa nes resté de ejëmpl. Die te l paie, professëur Edgar Moroder! Nosc cunduel plu sentì ti va ala fëna Waltraud y a si mutans Monica y Ivonne cun families."

La Usc di Ladins y Union Generela di Ladins dla Dolomites
La Usc di Ladins y la Union Generela di Ladins dla Dolomites sotrissea "l gran nteres de Edgar Moroder per la cultura ladina y la storia de nosc raion; cun truep articuli nteressanc nce te La Usc di Ladins àl partì si savëi cun duta la jënt de Gherdëina y ntëurora."

Roland Verra
L ex ntendënt dla Scola Ladina, Roland Verra: »Cun gran mueia éi audì che l stimà prof. Edgar Moroder ne n’ie nia plu danter nëus. Ie me l lecorde dantaldut coche un de mi miëur nsenianc canche jive a scola tl ITC »Raetia« de Urtijëi. Ël fova bon de descedé l nteres per la materies che l nseniova y muesse dì che me é juà dassënn de si fortl pedagogich y didatich, dantaldut tl ciamp dla biologia y dla geografia, ulache l savova da nes purté dant argumënc nia saurii te na maniera viva y nteressanta. L ie nce stat diretëur dl Istitut »Raetia«. Me lecorde nce l prof. Moroder ti ani canche fan tl cunsëi dla Union di Ladins de Gherdëina y ël purtova inant proiec culturei mpurtanc y inuvatives. Ulësse tlo auzé ora si ntujiasm y si mpëni per mëter a jì la gran defileda storica per i »2000 ani Ladins« a Urtijëi. Si lingia de publicazions, plucheauter n con’ dla cultura ladina y la natura de nosc raion, ie scialdi longia, coche nce la lingia de si trasmiscions cultureles ti media. Chël che à caraterisà deplù la persunalità che nes ie unida a mancë ie propi l ntujiasm, la pascion y vijion te duta si atività scientifica y culturela. L prof. Edgar Moroder lascia na gran locia tl panurama dla cultura de nosta valeda y nce sëurora.«

Erwin Frenes
Erwin Frenes, che ie stat caporedadëur dla Rai ladina, à nia per ultim nce tres si lëur cunesciù drët bën l prof. Edgar Moroder, che ie stat ani alalongia cunlauradëur per la trasmiscions dantaldut tl radio: »Prof. dr. Edgar Moroder, uem de cultura universela, atif a 360 degreies«, nsci descrij Frenes l defont, che ël lecorda mo cun chësta paroles: »L mond dla scola y dla cultura, ma nce di media ladins plura la mort dl prof. Edgar Moroder de Urtijëi, che à nstës fat storia per i ladins cun si atività multiculturela dai ani ’60 incà. L svilup culturel y soziel de na pitla mendranza sciche la nosta depënd da puecia persunaliteies, che mët si talënt y tëmp al servisc de si jënt. Chël che à caraterisà deplù la persunalità che nes ie unida a mancë ie propi l ntujiasm, la pascion y vijion de Edgar Moroder te duta si atività scientifica. L amor per la scienza y cunescënza da dé inant ai autri ie stata la miscion dl professëur y diretëur Moroder. Te mi prufescion jurnalistica per Rai Ladinia, ne n’éi cunesciù feter degun che fossa bon de splighé nce cosses cumplesses te na maniera nteressanta, zënza stufé. Cun chësta atività rera, se fajova Edgar Moroder prijé te scola, ti media, radio y tv y pra cunferënzes d’un sort. Die te l paie prof. Edgar Moroder. Te nes lasces n gran uet da prutagonist dla cultura nia me ladina, ma ti gran arpejon culturela y soziela viv inant y porta si fruc nce tl daunì!«

Daniel Alfreider y Edith Ploner
Dala pert istituziunela iel l assessëur per la scola y cultura ladina Daniel Alfreider y la ntendënta Edith Ploner che à tëut su cun duel y tristëza la nutizia dla mort de Edgar Moroder, nseniant y espert de scienzes natureles y dla storia locala, che per plu ani à nce sëurantëut la ncëria de direzion dl ITC de Urtijëi: »Edgar Moroder à judà a svilupé inant l sistem scolastich te nosta valedes ladines, ël ie stat na persona de referimënt de gran mpurtanza.«


L articul ntier ie da liejer tla edizion stampeda di 3 de auril.


Foto: Edgar Moroder.