La Usc di Ladins

La nutizia ne se aspitòven nia, la ie unida ora de n bel sarëinn:

"Ciau a duc! L ie ruvà l mumënt de finé via chësta aventura tan bela, scumenceda dan 18 ani. L saut cun i schi me à dat de beliscima emuzions. Da atleta y coche persona éi mparà propi truep te duc chisc ani: l sport ie propi na scola de vita! Chisc lecorc de marueia resterà per for te mi cuer, nsci coche la pascion, la fadia, l’adrenalina, la sudesfazions, la determinazion, i mumënc de delujion, la persones de marueia che é cunesciù, i viages y duc ch’i iedesc che messove stlupé dal rì cun mi cumpanies de scuadra, dal scumenciamënt inant, ntan che é fat n sport che ne cunesciove niancanó tl prim, ma che ie, ala fin dla finedes, deventà MI SPORT! N gra de cuer a mi familia y a mi nevic @francoisbraud che me ie FOR stac daujin. De gra a Romed Moroder (che ova abù l’idea mata de mëter su na scuadra dl’ëiles per l saut cun i schi...), a Martin Planker y Fabian Ebenhoch, al Schi Club Gherdëina che nes à dal scumenciamënt inant dat si sustëni, nscila nce a nosc sponsëur Suedtirol che à abù crëta te nëus. N gra ala Federazion @federazione_sport_invernali, ala Grupa dal Sport #fiammegialle, a duc i sponsëures che me à cumpanià te duc chisc ani, ala cumpanies de ventura, ai fisioterapisć, al staff, a duta la persones che me ie states daujin ntant duc i ani, y sambën a mi fans: zënza ëi ne ëssi nia pudù fé chël che fova n suenn, per mé."

Nscila scrij Elena Runggaldier sun si plata Facebook.

L se stluj l usc dla bela emuzions dal sport che Elena à abù per sé y che la nes à dat a duc nëus, l se gëura la porta de n capitul nuef. De gra Elena, dut l bon per ti daunì, truepa legrëzes y sudesfazions. Y dantaldut: mantën ti sense of humor!

David Lardschneider

Deplù te na proscima edizion stampeda de nosc foliet.

FOTO: Elena Runggaldier.