La Usc di Ladins

Bera Adolf Demetz de Lina, che sta cun si familia sun Plan de Gralba, à via per l inviern scrit su tan de nëif che l à fat ju sun Plan de Gralba.

Bera Adolf de Lina nes manda uni ann la tabela avisa de tant che l à nevët d’inviern, minà iel tla sajon, bele da nuvëmber inant nchin de auril-mei dl ann do: »De nuvëmber dl 2019 àl fat ju un n meter y 90 cm de nëif, de dezëmber 52 cm. Propi truepa n òvel fat ju te ch’i doi mënsc. Autramënter ti mënsc do: de jené dl 2020 n àl fat 12 cm, de fauré 13 cm. Do la rata puech, mefun. L ie da dì che l ie rie a museré canche l n fej datrai mé n doi cm. La ie pona jita inant nscila: de merz n àl fat bën un n meter y 4 cm, medrë dai 29 sun i 30 de merz n àl fat 42 cm. L di do fòvel pona 14 gradi sot a nul, chël ie stat l segondo di plu frëit de dut l inviern. Ai 29 y 30 de auril fòvel danterite plueia, ma l à nce mo fat trëi cm de nëif. De ndut éi nscila muserà cater metri de nëif ala fin dla sajon.«

La nëif nce ti ani passei sun Plan de Gralba
»A ti cialé de revieres ai ultimi ani ie l inviern cun manco nëif stat tla sajon 2016/17 cun 1 meter y 15 cm, l ann cun plu nëif ie stat l ann 2013/14 cun sies metri y 80 cm,« conta Adolf Demetz.
Tlo la trabela dla nëif di ultimi undesc ani:

2019-2020: 400 cm
2018-2019: 420 cm
2017-2018: 425 cm
2016-2017: 115 cm
2015-2016: 312 cm
2014-2015: 192 cm
2013-2014: 680 cm
2012-2013: 575 cm
2011-2012: 195 cm
2010-2011: 328 cm
2009-2010: 365 cm


FOTO: A man ciancia: nëif sun Plan de Gralba, a man drëta: Adolf Demetz de Lina.