La Usc di Ladins

Nia mé la Santa Mësses dla dumënia, di sandis y via per l’ena puderà da n lunesc ai 18 de mei inant unì zelebredes te dlieja cun la prejënza de jënt, ma nce batëisums, nozes, supeltures y d’autra funzions. Nsci iel unì fat a l savëi ufizialmënter dala Diozeja.

Mpue’ ueta y smarida fova bën te chësta ultima enes nosta vita religëusa, ulache la cumenanza cristiana tla Pluanies ne pudova nia plu se ancunté per zelebré deberieda mësses y funzions. Dassënn sentì àn chësta mancianza dessegur pra la supeltures, ulache l ie unit a mancë na pert mpurtanta – y chël no mé per chëi de familia – per tò cumià da persones de nosta cumenanza.
Da n lunesc ai 18 de mei saràl inò mesun jì te dlieja per d’uni sort de funzions y nce per giapé i sacramënc, ma la jirà nce tlo de se tenì a mesures de segurëza, coche urmei te uni ciamp de nosta vita.

La regules te dlieja
La Pluania de Urtijëi à ntant bele dat ora n scrit, ulache l ie metù ju la regules che ie da tenì ite y coche n se à mpensà de la mëter a jì per les tenì. Chësc vel per la gran pert dessegur nce per duta l’autra Pluanies. Scrit iel nsci:

• - I credënc dëssa jì ite te dlieja un al iede per schivé che l vënie a s’l dé grupes.
  
  
• - N puderà mé lascé ite na cërta cumpëida de jënt ala mësses, chësc acioche i sibe almanco un n meter de zes de uni viers, un dal auter. Te dlieja San Durich, mé per dì, puderàl ite nsci 170 persones.
  
  
• - Sun rëjes y pra la ntredes da les pertes saràl for na persona che avisa l jì te dlieja. Chësta persones muessa avëi sëura l mascherot, manëces da tò un n iede y n sëni che lascia ntënder che ëi ie iló per chësc servisc. Ëi toca da cialé che n se tënie ala regules per jì te dlieja y che l ne vede nia ite plu de tanc che l ie lascià pro.
  
  
• - A jì ite te dlieja dëssa i credënc sté almanco n meter y mez de zes un dal auter. Dan y ala fin dla mësses dëssa la portes de dlieja vester daviertes, a na maniera che n ne ebe nia drë’ de pië ite la snola y acioche la jënt vede aslune sot ora.
  
  
• -
  • 
  •  

  View the embedded image gallery online at:
  https://www.lausc.it/valedes-ladines/gherdeina/12679-ino-a-messa-te-dlieja#sigProId8155b33003
  Duc chëi che va te dlieja a mëssa o a vel’ fuzion muessa avëi sëura velch da curì bocia y nés.
  
  
• - Pra la portes de dlieja dëssel vester da garat n mitl da dejenfeté la mans.
  
  
• - Do uni mëssa muessa la dlieja unì dejenfeteda y lascià ite aria frëscia.
  
  
• - I buchei dal’ega santa resterà inant uec.
  
  

Ntan la Santa Mësses

• - L ie mesun acumpanië la mëssa cun l orgun, ma nia cun cores.
  
  
• - I credënc ne daussa nia pië ite i libri che ie ti sessli. Pra l sëni de pësc dëssen schivé uni cuntat.
  
  
• - Pra la cumenion dëssa l preve y chi che ti juda se dejenfeté la mans y tré sëura manëces da tò un n iede y nce n mascherot. A partì ora la cumenion dëssi sté plu de zes che la va y ti sporjer la cumenion a na maniera da no arziché la mans.
  
  
• - Nce chëi che va ala cumenion dëssa tenì la destanza de segurëza un dal auter.
  
  

Chësta mesures de segurëza vel sambën nce per i batëisums, nozes, sacramënc de penetënza, festa dl santuele, supeltures y nsci inant.


FOTO: La dlieja de Urtijëi.