La Usc di Ladins

Passa cënt studënc y studëntes dl ITE Raetia de Urtijëi ova respundù, mo ntan l lock down, ala dumanda: »Sun cie me ncunforti pa l plu canche chësta situazion tan ria sarà fineda?«


Ie sculé dl ITE respuende ncuei, canche l ie bele unì mujelà su la restrizions y n possa almanco jì ora de cësa. La restrizions ie unides mujeledes ch’l tant che adurvove per tré inò l fla, per tré ite l’aria de lidëza. Sun chël che me ncunfertove l plu fova zeche de scëmpl, na raida cun la roda, sentì inò l vënt sun la pel, l bel dl jì debota, la fadia tla giames per ruvé suinsom dl ërt y se fermé, suflan, a ti cialé a dut, a ti cialé a sé nstës y a dut chël che ie ntëurvia. I 4 de mei, na data tan banala coche fundamentela. Me é riesc nuzà dl’ucajion y son pià via cun la roda, y la cuntentëza fova mo majera de chël che me ove nmaginà danora. Y do n valgun mënsc iel povester stat l di ulache me é sentì finalmënter inò defin cuntënt.

L plu me ncunforti a pudëi inò jì ora de cësa y pudëi udëi duc mi cumpanies, mi amiches y mi amics, a pudëi rujené cun ëi, a i abracé ite! Me ncunforte sun la sëires che sunon deberieda, che fajon damat deberieda, che carton deberieda. Se ncunferton bele tan giut, tan dassënn, che on bele fat ora cieche fajeron do la carantena. L tëmp passà cun la familia ie dessegur mpurtant, ma do passa doi mënsc a cësa rati che l sibe gran ëura de passé l tëmp inò deberieda cun cumpanies. Nce a jì a fé festa, deberieda, ntan l fin dl’ena. Me ncunforte nce che posse festejé mi cumplì di ani, y che posse inò udëi mi cumpanies de Gherdëina, ajache nchinamò éi mé abù cuntat cun chëi de Bulsan.

La scola
Rate che do chësta restrizions me ncunforti belau inò a jì a scola, o, miec dit, l me savëssa plu bel che a sté a cësa dut l di, ti cialan ai mures y a n computer...

Coche dit, l plu me ncunforti a jì inò cun mi cumpanies sa mont a fé mpue’ de festa. Sambën me ncunforti nce a udëi inò mi cumpanies de scola y sambën nce a finé via la scola. Purtruep messons finé via nosc ultimo ann de scola nsci zënza pudëi jì a fé l viac de maduranza duc deberieda y zënza cëina deberieda cun i maestri. Povester pudons mpo mo urganisé la cëina plu inant: chël ti savëssa dessegur a duc scialdi bel.

Na bona à chësc mumënt rie dessegur – purtà: mo mei ne se à i jëuni y la jëunes, ma nce chëi plu de tëmp, ncunfertà tan dassënn!

L articul ntier tla edizion stampeda di 29 de mei

David Lardschneider

FOTO: »Me ncunforte a me ancunté cun mi cumpanies, a jì sa mont.«