Chemuns che sustën la families

Data

10 de jugn 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Tres la assessëures per l soziel, che fej ënghe pert dla scumenciadiva FamiLiam, iel unì dat ite ti trëi Chemuns de Gherdëina na mozion per na deliberazion de mascima per n chemun a mesura de familia, che sustënie la families. La delibera ie unida data pro da dui trëi i Cunsëies de Chemun, ala fin de fauré y prims de merz a Urtijëi y S. Cristina, śën nce te Sëlva. FamiLiam ie na rë de cunlaurazion danter plu lies, grupes y istituzion che à da n fé y se tol a cuer la cuestions dla familie.
La familia ie l cuer de nosta sozietà y sce la familia se n sta bën pona se spiedla chësc nce te duta la cumenanza. L ie na coa mpurtanta, l ie la prima luegia de sozialisazion, ulache n mpera a cunviver cun d’autri, a se deriejer te na grupa. L ie na pitla cumenanza tla gran cumenanza. Sce la sozietà à problems de truep viers al didancuei ie una dla gaujes dessegur nce la deficulteies y la crisa dla familia.

Na rë che lëura per l bën dla families
La scumenciadiva FamiLiam, che uel nce dì liam per la families, ie na rë danter plu assoziazions y istituzions che se dà ju cun cuestions d’uni sort che reverda la familia. Cun l sustëni dl Forum Prävention cun a cë Christa Ladurner, iel unit a s’l dé la scumenciadiva FamiLiam, ulache l ie reprejentà i trëi Chemuns de Gherdëina cun la assessëures per l soziel Martina Comploi de Urtijëi, Christine Senoner de Sëlva y Renate Senoner de S. Cristina cun nce Monika Zelger dl Chemun de S. Cristina, l Servisc Saniter cun l’ëifoma Wilma Prinoth, l Servisc Soziel cun la pedagoga soziela Barbara Dorfmann, la Cunsulënza per Families cun la psicologa Kathrin Hauser, la scolines cun la diretëura Hannelore Insam, la Kita cun Claudia Nocker, la Nëus Jëuni Gherdëina cun Karin Rabanser, l VKE cun la presidënta. L vën tëut ite nce d’autra istituzions, aldò dl bujën, y oradechël iel nce udù dant de tò ite persones ora dla populazion, sambën nce ëi, acioche nce chësta pert sibe reprejenteda per pudëi muever zeche a bën dla familia. L prim var ie stat de mparé a se cunëscer y udëi cie che uni lia o istituzion pieta, pona de se cuordiné, udëi ciuni che ie i bujëns y pité te un y l auter ciamp cie che la families adrova.

L vën pità truep, ma l ie mo cuestions mpurtantes
N à bele metù mpe na bela vela de servijes te Gherdëina y n à nce metù ju n program per i proscimi doi ani cun dut chël che l vën pità, ma n se à nce fat pensieres de cie che l sarà de bujën tl daunì per la families te Gherdëina, de ciunes che ie la cosses ulache la mancia l plu y de ce viers che n uel jì.
Metan adum la forzes y se metan adum tla rë FamiLiam, iel nce per la families plu saurì se ntupé per ruvé pra la drëta nfurmazions, i drë’ servijes y nce purté dant si bujëns.

L articul ntier cun i servijes pitei te Gherdëina per la families ie da liejer tla edizion stampeda di 5 de juni.

UK

FOTO: Reprejentantes dla istituzions y assoziazions che se à metù adum tla rë FamiLiam.