Ambolt nuef te Gherdëina

Data

23 de setember 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Veles de Chemun te Gherdëina: n ressumé
La nuvità dla veles cumeneles ie te Chemun de Santa Cristina: Christoph Senoner ie l ambolt nuef, cun n resultat scialdi bon de passa 66 percënt. Scialdi bona nce la SVP de Santa Cristina: nce sce la ova manco candidac y candidates sun lista iela stata bona de arjonjer la maiuranza assoluta te Cunsëi. Te Sëlva, a Urtijëi y a Ciastel réstel i ambolc da dant.

Sëlva
Deguna storia, te Sëlva fova la partida per l ambolt bele carteda ora. Cun n candidat sëul fòvel bele danora tler. Roland Demetz ie per l cuinto iede ambolt de Sëlva. Plucheauter fòvel nteressant a udëi cun ce resultat che l fossa unì lità.
Demetz se dij cuntënt dla cumpëida de ujes, che ie, te duc i iedesc che l se à candidà, resteda medema, ntëur a 850 ujes. L sauta mpo tl uedl la gran cumpëida de zedules blances y nules. A livel de lista à la Lista Zivica inò la maiuranza assoluta, cun 9 cunselieres.
La SVP de Sëlva à arjont sies cunselieres: l semea, pra na prima udleda, che i litadëures dla Lista Ladins, che ne à nia plu candidà, sibe jic via duc pra la SVP. Defin nscila ne saràla nia, zeche da migrazion saràl nce stat da pert dla Zivica de viers dla SVP, ntant che zeche dla Lista Ladins ti ie mpo jit ala Zivica.

Santa Cristina
A Santa Cristina à la Lista Zivica arjont l resultat de sies cunselieres, cieche ne n’ie nia puech, ma tla cunscidrazion che la ova deplù candidac y candidates sun lista, 15 de ndut contra i 11 dla SVP, tómel mpo tl uedl che la ne à nia sapù da se tré stimes assé. O, coche la ie tradiziunalmënter a Santa Cristina, na bona fëta dla populazion tën ala fin dla finedes mpo for pra la SVP, nce sce la lista ne fova – per cuantità – nia propi granda. Cun la maiuranza assoluta iel do la rata saurì a mëter su la Jonta, cun la SVP da sëula. Bonamënter ti dajeràn mpomo la man ala Zivica, che ti à, cun si doi candidates ambolt, bele danora segurà la ncëria a Senoner. Politicamënter, taticamënter, se àl tratà de n autogol, da pert dla Zivica, ma povester àla abù si bona rejons, cun na tatica sucrëta danter la pertes, per la nvië via te na cërta maniera, a Santa Cristina.

Urtijëi
A Urtijëi iel chiche à venciù y tl medemo mumënt perdù, nscila coche chiche à perdù che à tl medemo mumënt venciù. L ambolt Tobia Moroder resta te si ncëria, cun 115 stimes dan Lara Moroder, candidata SVP. Chël uel dì che sce 58 litadëures ti ëssa dat la stima a Lara Moroder mpede a Tobia Moroder, fossa Lara Moroder ambolta nueva. Chësc nia per ti tò zeche a zachei, ma mé per auzé ora tan strënta che la ie stata, pra la vela. Ma cun »sce« ne féjen ala fin dla finedes nia politica: la ncëria da ambolt resta pra Tobia Moroder. Ma la ie jita ora te na maniera scialdi valiva, danter i doi partic. Ajache l ie da tenì cont che la SVP ova mpo na bela cumpëida demanco de candidac y candidates sun lista. La Lega à candidà l prim iede a Urtijëi, y la ie nce ruveda ite cun un n candidat, che semea puech, ma che arà n si pëis, sce i doi »gran« partic ne s’la cherta nia ora danter ëi, te na sort de »gentlemen’s agreement«. La Lista Unica ne à chëst iede deguna maiuranza assoluta, la tratatives per la Jonta sarà nscila plu articuledes.

Frazions Ladines de Ciastel
Na bona nutizia iel per la trëi frazions ladines dl Chemun de Ciastel: de ndut iel ruvà ite trëi espunënc ladins te Cunsëi de Chemun. Andreas Colli mantën inant si posizion sterscia coche ambolt.

Ti on fat doi dumandes, doves prun a for un/na espunënt/a di partic ti cater Chemuns, n con’ de na si valutazion dl resultat dla vela y de coche l unirà a s’l dé la Jontes de Chemun. Chëstes ie da liejer tla edizion stampeda di 25 de setëmber.

David Lardschneider
 
FOTO: A Santa Cristina iel n ambolt nuef.