La Usc di Ladins

Nce per i Jëuni de Mujiga de Gherdëina ie chëla dal ann passà stata na sajon particulera. A d’ëi, coche a duc i autri, ti à l coronavirus trat sotsëura l program. Ma pur che la situazion ie mo for melsegura, àn mpo ulù cialé inant cun fidanza y à nvià via na sajon cun na bela lingia de cunzerc.

Cun duta la melsegurëza che l ie, dantaldut tl ciamp dla manifestazions, y che truep muessa unì lascià vester, fova l pensier di Jëuni de Mujiga de Gherdëina chël de fé mpo inant, de ti pité zeche ala jënt da tlo nce ora de sajon, acioche nia dut ne vënie desdit defin. »Sce n ne fej plu nia, va bel plan nce l nteres dojù«, miena l diretëur artistich di Jëuni de Mujiga Egon Lardschneider y chël fossa da muië, ajache la Lia à n bel publicum fedel.
Coche bele da n valgun ani incà cëlen de tré ite mpue’ d’uni sort de stii de mujiga. Cunzerc jazz n iel chëst iede doi, pervia de chël spent dal ann passà, pona cun strumënc de banda coche l Belgian Brass. L ie nce na grupa cross over, che fossa de teles che se mët adum cun d’uni sort de strumënc, la gran pert se scriji nstësc la mujiga, che ie mpue autramënter y se muev danter plu stii. L ie pona n cuartet de tlarinec y n cuintet cun strumënc a fla de lën desferënc. Sce la va mpue cëlen nce de tò grupes cun mujizisć de nosc raions. Coche bele nunzià iela nsci bele tl prim cunzert, cun l violinist Marco Kerschbaumer y la ciantarina Priska Malsiner. Pra l cuintet Pentaklang iel nce Andra Götsch de Lana, che sona l tlarinet y à venciù l cuncors per ruvé pra i Wiener Philharmoniker.

L articul ntier tla edizion di 2 de utober.

UK

FOTO: L cunsëi di Jëuni de Mujiga de Gherdëina (fotografia fata tl 2018).