La Usc di Ladins

Coche l ie udù dant te duta la provinzia, vëniel chësc fin dl'ena fat i tesć aslune nce ti luesc de Gherdëina. Per la frazions ladines de Ciastel vën i tesć fac mé n dumënia. Repurton tlo n curt coche n l'à metuda a jì ti chemuns desferënc.

Danora uel i ambolc y reprejentanc de Chemun ti mëter a cuer a duc i zitadins y a duta la zitadines de fé pea, per avëi n miëur cheder dla situazion. Sce n ie boni de abiné ora chiche ie positifs, pòssen i ijulé per tëmp y ëura y schivé nsci che l virus se sparpanieie ora mo deplù. N spera tla cumprescion y despunibltà dla populazion a fé pea, acioche chësta azion ne sibe nia unida fata per debant.

Tesć uni di dala 8 ala 18:00, a Runcadic mé de dumënia
Ti chemuns de Urtijëi, S. Cristina y Sëlva vëniel te chisc trëi dis che vën, da ncuei vënderdi ai 20 de nuvëmber nchin n dumënia ai 22 de nuvëmber, uni di dala 8 daduman nchin la 6 da sëira, fat i tesć antigenics te sëntes desferëntes. Per i zitadins dla frazions ladines de Ciastel, Bula, Runcadic y Sureghes iel udù dant mé la dumënia per fé l test, sambën ntan dut l di.

Documënc y nfurmazions per l test
I zitadins y la zitadines da 5 ani insù à giapà chisc dis na lëtra cun duta la nfurmazions de utl per jì a fé l test antigenich, leprò nce doi formuleres. Un de chisc ie per la privacy y l auter per se nunzië a fé l test, ulache l ie da scrì ite de plu nfurmazions dla persona nstëssa. Tlo iel nce da purté ite l numer de telefonn y la email, chisc va de bujën per giaté dopro l resultat dl test. Sce n ne à nia na adres email pòssen dé sëura chëla de zachei de familia. Per i mëndri de età – chëi sot a 18 ani – muessa i genitores, o chi mpede ëi, scrì ora l formuler. Chisc ne possa nia jì da sëui a fé l test, ma muessa unì acumpaniei. Canche n va a se lascé fé l test iel da tò pea la doi zedules, n documënt de identità y la tessera sanitera.

Chi ne muessa pa nia fé l test?
Nia drë' de jì a fé l test ne n'à chëi che n à fat un ti ultimi 3 dis, chëi che ie tla cësa de paussa y chëi che ie n carantena ne daussa ënghe nia jì.

Per schivé che te cër dis o te cër mumënc dl di se abìnel truepa jënt, ti vàl l nvit a chiche possa de se crì ora n'ëura ulache l pudëssa vester manco jënt. A uni moda saràl dan la sëntes i desfudafuech che fej servisc y juderà a mpartì ite aldò dla stazions de test.

S. Cristina
A S. Cristina ie la sënta per i tesć tla Cësa de Chemun, tla gran sala de teater. Tlo àn partì su aldò de trëi raions y l'à metuda a jì nsci che de vënderdi ie nviei a fé l test i zitadins de Soplajes y Mont de Pana, de sada i zitadins dl zënter y la dumënia chëi de Plesdinaz. Sce zachei ne n'ëssa propi no dl'aurela de jì n chël di, pòssel zënzauter nce jì un di autri dis. Ma nce sce zachei passa iust dan chemun y vëija che l ie puecia jënt, pòssel zënzauter ënghe jì ite, nce sce l ne n'ie nia l di udù dant per ël o ëila. Sce n ne à nia pea la zedules n giàpen nce iló, ma n muessa les scrì ora dan jì ite te sala per l test.

Sëlva
Te Sëlva vëniel fat i tesć tla Pitla Sala daujin ala cësa de cultura O.v. Wolkenstein. I zitadins de Sëlva à giapà daujin ai formuleres nce na comunicazion cun l di cunsià per ëi da jì a fé l test y oradechël nce la linia sun ciuna che i ruva permez a si stazion per l test. N à partì su sun i trëi dis aldò dla stredes te chëles che la jënt sta. Per schivé de messëi aspité giut, possa chiche uel nce fé ora n terminn tres na app che n possa desćiarië dala plata internet dl Chemun (www.selva.eu) y se stampé ora i formuleres che ie da tò pea canche n va a fé l test y la nfurmazions dates dant dal sistem.

Urtijëi
A Urtijëi iel unì njenià ite la stazions per l test te doi sëntes despartides. Tla cësa di cungresc y tla palestra dla scola elementera sun Plan de Mureda. Tla cësa di cungresc possa jì i zitadins dla sezion de vela 1 y 4, praticamënter chiche sta tla stredes Cademia, Grohmann, Cademia, Pedetliva, Petlin, Pitla Sotria, Rezia, Sotria, Stufan, Trebinger, Tresval, J.B.Purger, Nevel, Plaza San Durich, Praruf, Rumanon, Sciron, Socrëp, Stazion y Zitadela. Tla palestra dla scola elementera puderà jì a se lascé fé l test i zitadins dla sezions de vela 2 y 3, plu avisa chiche sta tla stredes Bataian, Bruel, Coi, Costes, Cuca, Doss, Roma, Sacun, Sneton, Sobosch, Val d'Anna, Fr. Tavella, Lip, Mëisules, Mureda, Pinoi, Resciesa, Scurcià, Tinderla. A Urtijëi ne n'àn mpo no ulù partì su la jënt aldò de dis y orares, ma l ti va l nvit a duc de jì ntan dut l di danter la 8 daduman y la 6 da sëira. Tl chemun de Urtijëi pòssen ntan chisc trëi dis lascé debant i auti sun la plazes da parché y tla garajes publiches. L ambolt de Urtijëi à mo sotrissà che nce chëi che sta te Gherdëina y ne n'à nia la residënza tlo, y ne n'à nsci nia giapà l nvit dal Chemun, possa jì a se lascé testé. Mpurtant iel che i sibe purtei ite tl sistem saniter provinziel.

Runcadic per la frazions ladines
Coche bele nunzià iel per la frazions de Sureghes, Bula y Runcadic da pudëi jì a fé l test mé n dumënia, for dala 8:00 nchin la 18:00, tl magasin di destudafuech a Runcadic. Coche l assessëur per la frazions ladines nes à cuntà, ie chësc nsci ajache l ne fova te n prim mumënt nia udù dant na stazion per fé l test tla frazions ladines dl chemun de Ciastel, ma n à mpo ratà drët ti dé l mesun ai zitadins de chësta frazions de pudëi l fé tlo. L ti ie perchël unì mandà ora, leprò pra i formuleres, nce la comunicazion cun l'ëura da chëla che i à da se prejenté. Pervia de chësta situazion particulera vëniel prià bel de tenì ite i orares dac dant, ajache scenó àn n problem de ti la fé a fé i tesć, dij Alfarei. L vën mo fat a l savëi che l ne vën nia jit n cësa a fé l test. Tres email y sms vëniel fat a l savëi puech do coche n possa ti cialé al resultat dl test.

UK

FOTO: Tl magasin di destudafuech a Runcadic possa i zitadins dla frazions ladines de Ciastel se lascé fé l test mé n dumënia.