La Usc di Ladins

«Sce ësse ulu mazé mi fra, ëssi pudù l fé, ma me é fermà,» ti à dit Ivo Rabanser a si aucac Mara Uggè y Marco Boscarol, che ie jic a l crì te perjon a Bulsan. I Carabinieri l à abinà te cësadafuech n la sëira danter sada y dumënia, cun l fra Martin fërm tl liet de si majon, cun l fuià blanch sbujà dal curtel lonch zirca chindesc zentimetri. Al mumënt ie Rabanser acusà de tentatif de mazeda.

Rabanser ie inò unit de reviers te Gherdëina do 24 ani te chëi che l ova fat la vita da clochard, danter Milan, Legnano y tl 2014 Verona. L se n fova jit da Sëlva cun 18 ani, do la mort dl pere. La familia ova monce damandà l aiut dla trasmiscion "Chi l'ha visto?" sun Rai 3.
L diretëur dla cuoperativa "Il Samaritano" dla Caritas de Verona, Marco Zampese, conta tres l Corriere dl Venet: «L fova n zënzatët plutosc atipich: scialdi studià y cun de gran capaziteies de lauré. Mei stat viulënt, ala nutizia de si arest sons restei zënza paroles. Da nëus iel ruvà ala fin dl 2019 y l ie restà nchin ai 13 de merz de chëst ann, canche l ie sparì zënza ne dì nia. Tl prim durmìvel tl zënter dla zità, pona tl parch a Bosco Buri.»
Nce Roberto Vassanelli, che fajova ntlëuta l ultenter per la lia "Gli amici di Paolo Favale" y ti dajona da gusté ai pueresc, conta tres l Corriere dl Venet de avëi cunesciù Ivo tl 2014, canche l univa belau uni di daduman: «Ivo ie scialdi resservà, ma n iede me àl cuntà dla cuestions cun i fredesc che l ova purtà a se n jì. Canche ti ove damandà ciuldì che l ne crissa nia d'albierch te na strutura, me òvel respundù che l durmiva plu gën sun streda, cun si sach da durmì y si flucion, te chël che l fova dut si mond.» 
La vita de Rabanser ie jita inant danter domesdis a liejer tla biblioteca universitera y lëures te n zënter dal tennis y pona da verzunier. Pona iel sparì, dan sët mënsc, zënza ne dì nia a deguni. Tla nuet danter sada y dumënia iel pona inò unit te Sëlva, rumpian ite tla cësa dl fra y dla cunieda.