Resultac di atlec de Gherdëina ntan chësc ultim fin dl’ena

Data

17 de dezember 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Biathlon

Na bela nutizia pudons dé dala garejedes de Copa dl Mond de biathlon a Hochfilzen, ulache la stafeta taliana cun Alexia Runggaldier, Dorothea Wierer, Lisa Vittozzi y Federica Sanfilippo à venciù la bedaia d’or. Bele tla ultima garejedes àn udù che la biatletes talianes - dantaldut Dorothea Wierer che ie nce danora tla tlassifica de Copa dl Mond - ie te n bon mumënt y à arjont de bon plazamënc. Alexia ne n’ie mo nia tan n forma sun i schi coche l‘autres, purempò iela stata bona de fé si pert y dantaldut de no se lascé purté dainora dala cunzentrazion coche n à pudù udëi da atletes dl’autra nazions. Na bedaia d’or plu che meriteda per la stafeta taliana dl’ëiles.

Stlupetà bën, cun nianca un n fal, ie Alexia Runggaldier tl’autra doi garejedes states a Hochfilzen, ruveda 43ejima tla sprint y 27ejima dla garejeda de jì do (pursuit).

Irene Lardschneider garejova i medemi dis te Ridnaun per l IBU Cup: tla sprint iela ruveda 23ejim cun 1 n fal a stlupeté y dla garejeda de jì do iela stata bona de se tré inant al 16. post cun 0 fai di cater iedesc de stlupeté.

Cumbinazion nordica

Chësc fin dl’ena, ai 14 y 15 de dezëmber, iel stat garejedes dl Continental Cup ti USA tl Steamboat Ski Resort, Howelsen Hill, ulache Lukas Runggaldier ie tramedoi dis ruvà al 5. post. Aaron Kostner ie ruvà 17ejim y l di do al 9. post.

Saut cun i schi

L’ëiles dl saut cun i schi garejova a Premanon tla Franzia sun l saut HS 90.

Lara Malsiner ie tla garejedes de Copa dl Mond, che à metù man al scumenciamënt de dezëmber, for stata bona de ruvé tla primes vint. Nsci nce tla Franzia, ulache la ie n sada ai 15 de dezëmber ruveda 13ejima, se miuran dal prim al segondo saut n cont dla lunghëza, ma purtruep nia n cont dl stil. N dumënia iela cun l cuinto saut plu lonch tla segonda manche stata bona de se davanië l 12ejim post.

Elena Runggaldier ne n’à nia abù fertuna tla Franzia y à messù se cuntenté cun n 37ejim y n 38ejim post, zënza pudëi fé l segondo saut dl di.

Alex Insam porta resultac drët costanc pra i ëi de Copa dl Mond y ie for bon de passé la cualificazions, cossa che ne n’ie nia nsci pra si cumpanies dla scuadra taliana.

Chësc fin dl’ena a Engelberg tla Svizra iel ruvà n iede 33ejim, ne se cualifican mé per puech nia per l segondo saut, y ruvan 38ejim n dumënia cun n saut da na bona lunghëza, ma giapan manco ponc.

Snowboard

Ai 13 de dezëmber fòvel la prima garejeda de Copa dl Mond da chëst ann sun Jëuf de Ciarëza y n sada ai 15 de dezëmber la segonda a Cortina. Te tramedoi luesc garejova sibe l’ëiles che i ëi te n slalom lerch paralel.

Pra i ëi ie Daniele Bagozza ruvà tramedoi iedesc 18ejim. Venciù a Cortina à l veteran Roland Fischnaller.

Pra l’ëiles ie Aline Moroder ruveda 37ejima y Sindy Schmalzl 41ejima sun Jëuf de Ciarëza, ulache Nadia Ochner à venciù. A Cortina iela jita miec per la doi atletes de Gherdëina: 27. Aline y 28. Sindy. Venciù à Ester Ledecka (CZE), che sun Ciarëza ie ruveda segonda y che ie na atleta che fej nce garejedes de schi, la sarà nce leprò i dis che vën pra la garejedes de Copa dl Mond sun la Saslong.

Schi

Ncuei lunesc 17 de dezëmber iel stat na garejeda de slalom lerch de Copa Europa a Andalo.

Alex Vinatzer, tla prima manche mo 30ejim, ie stat bon de stlù ju al 25ejim post. Sun podest ie ruvei i doi talians Ballerin (2.) y Maurberger (3.)  Leprò nce i doi atlec dla Val Badia Hannes Zingerle (15.) y Alex Zingerle (20.). Alex Vinatzer ie perdrët plu slalomista y auzon mo ora si vënta tl slalom de Copa Europa a Levi al scumenciamënt dla sajon.

Nicol Delago à ncuei lunesc pra la proes dla libra de Copa dl Mond sun la Saslong fat l terzo y pona l segondo miëur tëmp. (uk)

FOTO

Alexia Runggaldier (foto de archif S. Schwan)