Ert desfratada

Data

23 de jugn 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Orcena: Dan 18 agn ê i vidri artistics dl artist Albert Mellauner ciamó gnüs paiá chi 50 miliuns de lires, dan da püch ési gnüs condüs demez y bunamënter desdrüs. Al n’é nia le pröm iade tla Val Badia che "ert publica", comanada y paiada dala man publica (chël ó dí: da düc) vëgn desfratada
I jun derevers ti pröms ann 2000, canche le Zënter sozio-sanitar nü a Picolin ê gnü fat. Iló â la Comunité de val de Puster, comitënta di laurs, ince ponsé a idees artistiches da reaslisé dan l’entrada, o/y tl foyer y sö por les stighes internes. Cina chi agn fajô l’acompagnamënt artistich pert dla costruziun instëssa (por todësch "Kunst am Bau"). Soma metüda a desposiziun: 117 miliuns de lires. Dodesc ê stá i proiec de artisć resp. grups de artisć presentá dan ala giuria dl concurs, metüda adöm da rapresentanc dl comun y dl distret sanitar, desco ince dal diretur dla repartiziun provinziala por i laurs Josef March y dai esperc d’ert Karlheinz Mureda (diretur dla scora d’ert de Gherdëna) y Josef Gasteiger (dirigënt dl museum dla cité da Bornech) y dal’architëta Kathrin Gruber. La comisciun â cernü cin’ proiec, cater de chisc á podü pié do n pest de scioldi y un l’esecuziun dl laur. I cater pesc de consolaziun i ê jüs a Babara Tavella, Lois Anvidalfarei, Lois Rottonara “Rott” y Alfred Tavella. Realisé süa proposta deboriada á podü i dui artisć Albert Mellauner y Franz Irsara. La motivaziun scrita a protocol dla comisciun dij: "Le proiet artistich vá ite söla forma dl frabicat y acompagnëia les porsones che röia te ciasa sön so tru fina al compimënt; tla demostraziun vëgnel alzé fora la poscibilité desvalia di mesi d’espresciun, l’esecuziun resservada y la pitöra dezënta söi vidri." D’isté dl 2001 ê i laurs da pert di artisć gnüs reaslisá y ince paiá. Le proiet, che tol ite deplü componëntes (vidri y parores intaiades sö por i limi de stiga), n’é sëgn, da n ann y mez incá, nia plü da odëi tla ciasa soziosanitara, o dit damí: ma plü en pert - ajache i parëis de vider al’alzada tera, realisá sön idea dl artist Albert Mellauner cun la tecnica de "saurun sprinzé" (che amerscia a na manira fina le vider) é gnüs desfratá. A so post á i comitënc di laurs a Bornech y le proietant ponsé a n parëi de spidl industrial y massif.

Liede do deplü tla ediziun atuala de "La Usc di Ladins"!
 (Iaco Rigo)