Aiüt Alpinisć Alta Badia - de gran mudaziuns

Data

23 de jugn 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Müda generazionala a ce dl Aiüt Alpinisć Alta Badia, olache dui pilastri á lascé y al vëgn docá forzes jones. Fabian Oberbacher é surastant nü
Les raisc dl Aiüt Alpinisć Alta Badia vá bele zoruch al ann 1956, mo impormó l’ann 1990 él gnü amplié le socurs ti crëps incër le Sela cun la fondaziun dl Aiüt Alpin Dolomites adöm cun les döes valades de Fascia y de Gherdëna. Da dailó inant y cun l’aumënt dl turism tla munt, é les zifres di intervënc tres ma plü chersciüdes. Por la seziun Alta Badia, che é metüda adöm da 31 omi, s’á l’ann 2018 stlüt jö cun n numer complessif de bëgn 98 intervënc. Bëgn 189 d’atri intervënc é gnüs fac dai mëmbri dla scuadra en sorvisc pro la sënta dl Aiüt Alpin Dolomites a Pontives. 

Na gran mudaziun é gnüda a s’l dé chësta aisciöda cun les lítes dl consëi dl Aiüt Alpinisć Alta Badia. Fabian Oberbacher á tut sö l’inciaria da surastant, che é stada dal 1980 incá sön les sciables stersces de Willy Costamoling. Fabian gnará daidé da so vize Roman Crazzolara. Dl consëi fej ciamó pert Andrea Oberbacher, Andreas Alfreider, Ingo Irsara y dal scrivan Raimund Irsara. Trat zoruch s’á ince Bastl Oberbacher, vizesurastant dal 1987 incá. An podess feter dí che chësta é stada na mudaziun generazionala, sciöche al é dal’atra pert ince dërt che al sides. Les esperiënzes  y le conescënzes che é gnüs adöm te düc chisc agn dai fondadus, gnará zënzater dades inant y partides cun i atri, por mioré tres deplü le sorvisc de pröm aiüt. 

N giulan de cör ti vá a chi che é jüs ite te chëstes inciaries nöies y plënes de desfides. N giulan ciamó maiú a chi che les á curides fina sëgn, ofrin sö tröpes ores de tëmp lëde y meton ince en prigo la vita por daidé le proscim. Willy y Bastl, giulan!   (ep)