Tempesta "Vaia" - mez le lignan é lauré sö

Data

18 de messel 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Zifres atuales dla gran tempesta dl’altonn 2018 tl Südtirol: 1,5 miliuns de cubich de lignan rosedé sön 6.000 hectars, 463 teleferiches nöies, 20 cursc aposta, 1 miliun de pici lëgns
La repartiziun forestala dla Provinzia á arjigné na relaziun cun les zifres atuales en cunt dla gran tempesta "Vaia", che á rosedé l’ann passé bosc intiers. Les zifres fej zënzater parüda: le gran vënt á rosedé bëgn 1,492 miliuns de cubich de lignan, sön na spersa de 5.918 hectars. Dui terzi dl lignan danejé é sön teritore dles staziuns forestales da Nöia Ladina, Nöia Todëscia, Kaltenbrunn y Al Plan de Mareo. Cina ai 17 de ma 2019 êl bele gnü lauré sö te Südtirol 757.840 cubich, che corespogn al 51% dl total.
La tempesta á atoché bëgn 2.100 patruns de bosch te 86 comuns. Le Comun plü atoché é sté Nöia Ladina cun 362 mile cubich, olache an n’á lauré sö le 53%, spo Nöia Todëscia cun 270 mile y le 49% de laurá sö y Aldein cun 194.000 cubich de dann y le 33% laurá sö. Dessot la situaziun ti comuns ladins:

Mareo: sön chi 60 mile cubich de lignan rosedé n’él gnü lauré sö 30 mile, le 50%
San Martin de Tor: sön 30 mile cubich n’él gnü lauré sö 10 mile, le 33%
La Val: sön 30 mile cubich n’él gnü lauré sö 5 mile, le 17%
Badia: sön 24 mile cubich n’él gnü lauré sö 1.500, le 6%
Corvara: sön 6 mile cubich n’él gnü lauré sö 1.500, le 25%
Santa Cristina: sön 4.000 cubich n’él gnü lauré sö 3.500, le 88%
Urtijëi: düc i 1.000 cubich é gnüs laurá sö
Sëlva: sön 400 cubich n’él gnü lauré sö 200, le 50%

Por lauré sö le lignan él gnü metü sö 463 teleferiches, de chëstes é 300 bele indô gnüdes tutes demez. La Scora Forestala dl Latemar á iniann organisé 20 cursc, olache 112 partezipanc á podü imparé le förtl da lauré le lignan. An pënsa sambëgn ince al dagní, plü avisa da arjigné plantes nöies da senté dö. I ispetorac forestai prevëiga da senté anter le 2020 y 2025 passa n miliun de lëgns nüs.
Ti raiuns atocá dala tempesta él ince prigo dal chefer dla scorza. Por tigní sot a control la situaziun laoron deboriada cun l’Istitut de Entomologia dla Université de Padoa.  (pablo)