N auto de ciomënt

Data

08 de otober 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Chësc é n bun ejëmpl! Giovanni Trebo da San Martin s’á tut la bria da jí a cöie sö ciomënt do strada. Te na te’ picia ora él rové adöm n gröm...
Sce an vëiga refodam ia por tera pón se dessené, an pó se lascé sö pro zacai, an pó le cöie sö instësc. Giovanni Trebo da San Martin á tut la terza opziun. Bele plü iadi âl odü che al ê da Picolin fora tres indô de vigni sort sön ur’ de strada. En lönesc de chëst’edema él passé ai fac y s’á tut la bria da se fá jö le toch danter Picolin y Longega y romené sö instës. Nia de comané, nia de organisé, ma süa buna orenté. Al cunta: »Olache ara jô da lascé l’auto stôi chit, spo ciarâi da jí dlungia strada a cöie sö«. Al á albü na te’ picia ora de laur, mo le resultat é bëgn na morvëia. Cun le ciomënt ál sciafié da se ciarié ite l’auto iadedô: bossi, bozes de plastica y ince de spidl, papiers, na dregia de poc y ciches de zigarec. Al se fej instës morvëia: »La maiú pert patüc che an podess dé jö debann.« Chël á Giovanni ince fat: le ciomënt coiü sö röia te zënter de reziclaje a Alfur, olache le material gnará spo mené inant y lauré sö por l’adoré danü. Giovanni ne n’ó pordërt nia taché süa aziun söla gran ciampana: »I n’á pa fat nia d’extra« – dijel y injunta: »Ci che i á coiü sö ê propi le maiú. Sura strada jö él ciamó n gröm de papiers, an messass propi se tó n de dlaurela.« N complimënt y n lalt por l’ejëmpl che al á dé, meton en pratica le respet por l’ambiënt. Che sá pa? Te tëmps de Greta Thunberg y de na maiú sensibilité por la contrada n’él magari ince d’atri che ti vá do. La miú soluziun restará indere tres ciamó öna: chëra da ne sciuré daldöt nia le ciomënt te nosta natöra. pablo  (pablo)