Na mostra che vá ala sostanza

Data

09 de otober 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Te Ciasa de Palsa él gnü daurí na mostra sön la tematica dla cura y dl guern. Ara dëida cuché ite tla vita de chi che adora cura y chi che la píta
Sce an baia de cura, vá le pröm pinsier poester sön l’ospedal o la ciasa de palsa. Chisc é sambëgn posć olache la cura sozed de por de. Cura sozed indere ince fora por les ciases, ion o iniert, tl chît. Al é n tema cotan plü ampl, che mët bele man canche i mituns á na coia, y ciafa espresciun ince canche al nasc na porsona cun dejabilité, canche n familiar s’amarëia, canche i geniturs, l’om, la fomena, n’é nia plü bugn da fá instësc, y tan d’atres situaziuns lapró.
Le Museum dles Ëres da Hittisau (Austria) cun süa direturia Stefania Pitscheider d’Al Plan á tut tles mans la tematica y n’á fat d’infora na mostra, che é sëgn da odëi tla Ciasa de Palsa "Ojöp Frëinademetz" a San Martin. La daurida é stada en vëndres ai 4 d’otober, olache an â te ciasa de palsa ince d’atres rajuns da festejé: le De internazional dla jënt de tëmp y i 120 agn dal at de fondaziun dla ciasa. La mostra porta le titul "Cun cura – stories de guern, cura y palsa" y sará da odëi cina ai 12 de jená dl 2020. Ara ê nasciüda cun l’intenziun da inrescí plü avisa la storia dla cura, mo é spo deventada na testemonianza via de chës porsones che vir le guern de por de. Le nojel é rapresenté da na linia de panei, olache an ciafa lassura zitac de porsones che ciafa o che dá cura, tuc fora da 35 de gran intervistes che é gnüdes fates por l’ocajiun. Lapró él tesć de Roberta Dapunt de Badia, operes de so om Lois Anvidalfarei, retrac de Renate Hügli. Da odëi él ince massaries de cura da zacan, abinades adöm da Maria Hagleitner dl’Austria, che é stada na vita infermiera y á metü sö la scora de infermieristica a Bregenz. Na mostra che mët da ponsé do, y dëida forsc da se senté ite te na realté che reverda düc, jogn y manco jogn, de vigni classa soziala. Na tematica atuala y che ciafará tl dagní na importanza tres maiú.

Deplü sön la mostra, i 120 agn dla ciasa de palsa y le de dla jënt atempada ciafëise t’La Usc di Ladins di 11 d’otober.  (pablo)