N "sone cialt"

Data

15 de otober 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Comun de Badia: Indoman, mercui ai 16 d’otober 2019, dales 9:00, se sentará adöm le Consëi de comun por nen baié danter l’ater ince – indó n iade – dl regolamënt por deslié le vincul aladó dl art. 79/bis dla Lege urbanistica provinziala. Ti vá pa do Badia a Corvara?
Deslié na abitaziun convenzionada da vigni vincul ó dí che ara passa dala "politica soziala" al marcé lëde y ala speculaziun dles ciases residenziales.
Por indoman á l’Ombolt Iaco Frenademetz metü al ordin dl de le "regolamënt che reverda la prozedöra por tó demez le vincul dl convenzionamënt" – sciöche dit bele plü iadi: n vincul che le patrun é sté a öna da surantó se sparagnan cutes. Les abitaziuns convenzionades ti é resservades ala jënt che á debojëgn de na pröma abitaziun, y nia por fá marcé.
D’agost dl 2013 á le Comun da Corvara aprové chësc regolamënt, preodon la poscibilié por i cuatiers convenzioná da se cumpré dal Comun le desliamënt. Ti vá Badia do a Corvara? Indoman ciafaran na resposta, ciamó denanche la legislatöra atuala vais a piz! Deplü porsones internes al Comun dij che la proposta dl Ombolt da aproé le regolamënt ne passará nia, ince deache al ó ester la maioranza de 2/3.

Ci dij pa pordërt la lege?

I proprietars de abitaziuns convenzionades nia ocupades à la poscibilité de damanè le desliamënt dal vincul, te Comun. La poscibilité da damanè chësc desliamënt n’é nia preodüda por ćiases convenzionades interessades dala desposiziun aladô dl articul 79/bis, coma 4 dla Lege Urbanistica provinziala, aldefora che al sides stè la renunzia ala sovenziun dl frabiché provinzial, y le desliamënt n'é gnanca preodü tl vërt agricul, vërt alpin o bosch.
Te vigni cajo vàra ma sce sides le Comun co l’Istitut provinzial por le frabiché sozial ne dà dant degun afitadin tla abitaziun convenzionada che ais la rajun dan i terminns fissà avisa.
Y al articul 5) che trata le "Nulla osta por straihé le lian" vëgnel dit:
<Anter le terminn de 30 dis dala presentaziun dla domanda por straihé le lian tol l'Ombolt la dezijiun por ći che reveda chësta domanda cun n provedimënt aposta, y determinëia, tl cajo de azetaziun dla domanda, la soma preodüda dal articul 79/bis dla lege urbanistica provinziala (tl cajo de Corvara le contribut de conzesciun aumenté dl 300% - adr). Tl cajo de paiamënt dla soma determinada aladô di comi da denant anter i terminns scrić dant, dá fora l'Ombolt dô avëi relascè la lizënza da frabiché por la mudaziun dla destinaziun d'anuzamënt, le nulla osta por straihé le lian al liber fondiar, che le damanant mëss paié al Comun, scenò tómel le dërt de desliamënt, anter 30 dis dala notificaziun de chësc provedimënt.>
<La basa de calcolaziun dla soma dita tl coma da denant é metüda adöm dala cubatöra urbanistica y dala cubatöra sot tera por ći che reverda l'abitaziun convenzionada. La cubatöra urbanistica y chëra sot tera vëgn calcolades tla medema mainira aladô di criters fissà dales normes de atuaziun dl plann urbanistich de comun varënt al momënt dl desliamënt.>
<Tl cajo de paiamënt dla soma determinada aladô di comi da denant anter i terminns scrić dant, i dà ca l'Ombolt - do avëi relascè la lizënza da frabiché por la mudaziun dla destinaziun d'anuzamënt - le nulla osta por straihé le lian al Liber Fondiar.>  (Iaco Rigo)

Galaria retrac