Al nasc la Cooperativa Turistica Al Plan/San Martin

Data

03 de dezember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Le punt plü important dla reuniun generala dl’AT Al Plan/San Martin é stada la mudaziun dla forma iuridica, che portará a n bel sparagn fiscal
Sciöche pro les assoziaziuns turistiches dl’alta valada, ân ince tla reuniun generala dl’Assoziaziun Turistica Al Plan/San Martin, en jöbia ai 28 de novëmber, na pert straordinara al ordin dl de. Do la fujiun dles döes assoziaziuns dla bassa valada dl 2015, án chësc ann fat n ater vare important: la trasformaziun dl’AT te na Cooperativa Turistica. Por dé pro a chësta mudaziun messâ ester presënc trëi cherc di mëmbri dl’AT (264). Ala fin n’él rové adalerch cun deleghes indöt 275, le 78%, ci che pormetô da fá le vare. Dit damperfora: la mudaziun é gnüda aprovada dan le notar al’unanimité, y chësc do che le consulënt Fortunato Verginer á splighé plü avisa ci che la mudaziun comporta.
La mudaziun da Assoziaziun Turistica a Cooperativa Turistica porta dantadöt n vantaje fiscal, le sparagn sön l’IVA. Cun n bilanz che se roda incër i 1,8 miliuns de euro vëgn le sparagn por Al Plan y San Martin sciazé tla mosöra de chi 80 cina ince 100 mile euro al ann. Al é döt scioldi che pó spo gní investis a bëgn di mëmbri, te strotöres y sorvisc che öga por renforzé le turism. La cooperativa turistica, á splighé inant Verginer, resta na sozieté de capital cun sü organs. Sce an á de un n vers n sparagn fiscal, comporta la mudaziun plü rigorosité por ci che reverda la redaziun dl bilanz y ince i controi, olache la cooperativa messará gní controlada vigni 2 agn da n organism estern. Lapró arára ince da mëte da na pert le 3% dl davagn, che jará te chël che an tlama le fond de mutualité – n fond che conzed spo dl ater vers ince da ciafé contribuc spezifics. Ince le presidënt Werner Call á baié dla dezijiun sciöche de n vare tla dërta direziun; n vare che gnará por ater ince fat tl dagní te d’atres assoziaziuns turistiches, sciöche te chëra pormó aprovada dl’Alta Badia. La cooperativa turistica é piada ia atira, dal punt d’odüda fiscal metarán man cun l’ann nü.

Tla reuniun generala án ince lité danü le diretif y an á presenté valgügn proiec interessanc por Piz de Plaies, Börz y Ciamaur, che dess garaté dl 2020. Deplü ves dijunse t’La Usc di Ladins di 6 de dezëmber 2019  (pablo)