La "odissea" dl Sandman

Data

07 de dezember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L professur Petrobon chir ciamó material fotografich y scric, por arichí döta la documentaziun
La storia dl fligher bombardier american B-24 "The Sandman" conësc tröc badioc, al ê gnü atoché tratan la batalia aera dala Luftwaffe avisa ai 19 de dezëmber 1943 (batalia ince clamada "Goldener Sonntag") y ê spo tomé jö ti crëps sura Calfosch. Le professur Giorgio Pietrobon da Treviso che ti stá do dal ann 2000 ala storia dl fligher american é sté bun cina sëgn da cöie adöm testemonianzes ütles y material che öga. Te serades y referac ál ti agn passá informé söla odissea de chësc fligher y i soldas che á pordü te chësta desgrazia söa vita. Pietrobon dij che al é sté n gröm de badioc, ëi y ëres, che l’á daidé inant te döta la inrescida y recostruziun dl caje.
Importanta y crujala te söa archirida ê stada laota na scincunda – sciöche al cunta: na banda numerada te na fabrich, che Franz Mersa dl Trafoi adorâ te söa stala. Tres le numer intaié söla banda, che ê n rest dl fligher, êra jüda da ciafé fora sön internet te ma 24 ores l’identificaziun dl fligher y dl ecuipaje. Al ê sté 10 morc, y al ê bele publiché n retrat cun 9 mëmbri dl ecuipaje che â pordü la vita!
De seghit, dl 2013, â le Comun da Corvara ponsé da mëte sö na tofla de metal sön Capela di Tomá te cortina, en recort ala tragedia en gaujiun dl aniversar di 70 agn. La notizia descedâ cotan de interes a livel nazional y ince internazional.

Retrac che cunta

Pietrobon é tres atif tla informaziun söl evënt belich: al é dozënt tl Istitut Tecnich Aeronautich "Fleming" a Treviso y recostruësc cun pasciun ti detais l’avenimënt suzedü tles munts sura Calfosch y Corvara: le laur n’é dötaurela nia stlüt jö, al ne zeda nia da chirí do testemonianzes nöies y ajuntives, proes y documënc. Al dij che ti ultims agn ál ciafé da ostires deplü fotografies fates da sü peri, che é de gran valüta por so laur da completé la cronica.

Tosc n liber

So laur d’archirida söl Sandman röia tosc a n capitul nü: Pietrobon ó dé fora n liber. Tl’America é la storia conesciüda sciöche la "Saga dl Sandman", y so contribut che s’á realisé dalunc dai videos storics y tesć storics americagn vëgn aspeté cun interes y coriosité. Pietrobon dess a chësta manira n contribut important al puzzle dla storia. So material coiü adöm y la conescënza söl fat suzedü se mirita na publicaziun.

L’apel ala jënt

Le professur Pietrobon fej n apel a dötes les porsones che se recorda di tëmps passá: "Chiride cun atenziun ti albums y tles scatores de retrac de familia, ajache iló él dessigü resté momënc y testimoni dl avenimënt, dl ecuipaje abatü y dl sit olache al ê gnü odü y ciafé i resć dl fligher y de döt le desaster de na vera combatüda ince sura nüsc ces. Al recompensará l’imprëst de material interessant cun videos y na cronica stampada te cater lingac. So contat: giorgiopietrobon@libero.it y tel. 328 7965742.

 (Iaco Rigo)