La Usc di Ladins

Alessia Sorá, poste te presenté te püces risses?
"Mi inom é Alessia. I á 32 agn y i sun nasciüda, chersciüda sö, y spo gnüda zeruch tl’Alta Badia. Al me plej ponsé da ester na esploradëssa, viagiadëssa y ëra dla munt digitala ('digital mountain girl'). Sce i ne sun nia defora tla natöra o sön le iade fora por le monn, laori tl team dl’Alta Badia Brand olache i me crüzi dla comunicaziun y dl marketing digital dla destinaziun Alta Badia."

I viëis tl’Alta Badia n invern che ne podess nia ester plü bel por la nëi y le bel tëmp. Ci fejeste pa de bel te to tëmp lëde?
"Te mi tëmp lëde ciari da sté le plö poscibl alaleria tl paraisc olache i viun: i vá cui schi, cun les pels o ince a pe, gonot da sora deache al me sá bel da chirí la surité y le chit o da aldí ma i sonns dla natöra. Chësc me dëida dër da ponsé y da me regeneré. Spo do avëi fat val’ por mi corp, ciari da me cruzié dl ciorvel: al me sá dër bel da lí libri de iadi, sozieté y comunicaziun y foliec de atualité dal monn, mo ince da jí te cités a ciafé ispiraziun, al chino o a val’ mostra. Y spo ciari sambëgn da dediché tëmp ince ala familia y ai amisc: sté adöm, s’la rí y mangé bun."

Fósseste bona da sté sciöche "porsona digitala" n’edema intiera zënza computer o smartphone?
"Chël é le mascimo y propi ci che i ó canche i chiri fora olá jí en vacanza." Sambëgn ne jíssera nia por mi laur, mo te mia vita privata ciari da sté tröp offline y da sté cun cosciënza tl momënt che i viri – ince sce al n’é nia saurí."

Tan "digitala" é pa nosta jënt?
"Tres deplü y al ne depënn nia ma dal’eté dles porsones: tröc á reconosciü les potenzialités dla rëi por süa vita privata y ince por sües ativités, mo ai á ince capí che al é n gran laur iadedôóy che an mëss le fá cun costanza y suradöt cun na strategia. L’interes é gran y dessigü él püc che n’á nia porvé da 'smaneté' cun chisc canai, spo él chi che lascia o se apascionëia y proa tres da fá deplü, se ajornëia y se devertësc. Le monn digital te sforza da porvé fora y imparé söl ciamp, da mosoré y da imparé danü: ti ultimi agn él sté na gran evoluziun tla manira da ponsé y tles competënzes de nosta jënt, che á porté de buniscimi resultac che ispirëia sides la comunité online co offline. Te n’otica de promoziun dla destinaziun á chësc impëgn porté de gragn früc: la digitalisaziun é aldedaincö esenziala, an ne pó nia la ignoré deache ala fej pert de nosta vita."

Deplü podëise lí tla ediziun stampada de La Usc di Ladins indoman!