La Usc di Ladins

Al ê le 1989 che al é gnü realisé l’implant a cabines "Olang I + II", da Valdaora sö cina sön Plan de Corones. Tla sajun che vëgn gnará i implanc fac danü y dess deventé n proiet nia ma tecnologich mo ince architetonich. Por le realisé s’án lascé sön le förtl dl stüde de architetöra todësch "schlotthauer matthiessen architecturemade", cun l’inj. Cornelius Schlotthauer (ex senior associate pro Zaha Hadid Architects). I implanc nüs gnará costruis dala dita Doppelmayr. Particolares sará les staziuns dl implant (a val, intermediara y a munt), cun curidöres trasparëntes y a forma de ones, che pormetará ince da odëi les perts tecnologiches en aziun. Impresciun fej i dac tecnics: cun les cabines nöies da 10 posć dessel gní condüt sö cina 3.900 porsones al’ora, a na velozité de 6,5 metri al secunt. Por fá n confrunt: cina ciamó ê la portada de 2.160 porsones.  (pablo)