La Usc di Ladins

Ai 3 de ma él lítes de Comun y bel plan s’armöion ti paisc y tles fraziuns por mëte da jí prelítes. Insciö ince a La Val, olache les prelítes é gnüdes tutes tles mans dal Ombolt Angel Miribung, en colaboraziun cun le comité SVP. Chësc nes dij ince che Miribung se metará indó a desposiziun por n’atra legislatöra sön le scagn da pröm zitadin. Chësc nes confermëiel ince al telefon. Dan 5 agn ân fat a La Val na prelíta olache la jënt podô fá la crusc sön na lista de inoms bele dá dant. Atramënter éra en chësc iade, olache an ti lascia ala jënt la liberté: sön la zetola pón dé dant n candidat o na candidata da ombolt y ince 4 porsones che an odess ion te Consëi. Vigni porsona che á le dërt da lité á ciafé na zetola a ciasa, y vignöna é gnüda numerada - da 1 a tantes che al n’é. Chësc á descedé perplessités pro valgügn, deache porsones á miné che cun chësc numer fossel meso da ciaré do che che á lité che. L’Ombolt Angel Miribung mët atira en tler che ara n’é daldöt nia insciö: "le numer unse ma metü por evité che jënt podess fá fotocopies y dé jö plü iadi la zetola. Le numer é metü a cajo y degügn ne sá ci numer che jënt ciafa." Y sëgn, ala jënt la usc.

Deplü tla proscima ediziun  (pablo)