La Usc di Ladins

Che al ne sides mine i pröms sëgns che la vita vëgn davëi massa cera? Chësta é sambëgn ma na suposiziun, mo la domanda pón se fá, sce an ti ciara ales zifres dl comun de Badia. Do n gröm d’agn che la popolaziun é jüda söpert, éra dl 2019 jüda zoruch cotan, de bëgn 33 unités. Chësc é ma un di dac dl movimënt demografich 2019. Tla Val Badia ânse ai 31 de dezëmber 2019 na popolaziun de 11.118 abitanc, che é dui demanco co l’ann denant. Al é gnü al monn 121 viadus – avisa tanc co l’ann denant. Mort él 101 porsones, che é 25 deplü co dl 2018.

Coriosité nr. 1: Te bëgn 7 paisc sön dodesc é la popolaziun dl 2019 jüda zoruch: plü avisa a Calfosch (­-3), Badia (­-7), La Ila (­-18), San Ciascian (­-8), Lungiarü (­-9), Antermëia (-­3) y Rina (-­7).
Coriosité nr. 2: Le Comun de Badia é chël che á albü la maiú rezesciun de abitanc, cun 33 porsones demanco. Le maiú aumënt él sté te Mareo cun +31. Le paisc d’Al Plan á por le pröm iade passé ia i 1.800 aciasá.
Coriosité nr. 3: Al paisc y comun da La Val i vál dl 2019 le primat de nasciüdes. Al é gnü al monn le bel numer de 22 viadus: 11 mituns y 11 mitans. Dedô vëgnel Al Plan y Badia, intrami cun 20 nasciüs.

Chëstes y d’atres coriosités ciafëise t’La Usc di Ladins di 24 de jená, cun zifres y statistiches paisc por paisc.

















 (pablo)