Al ê ai 20 d’aurí dl 1879 che le miscionar jonn Ojöp Freinademetz da Oies rovâ a Hong Kong tla Cina, deboriada cun so compagn pater Johannes B. Anzer. Rodunt 140 agn dedó él gnü porté sön paladina a Hong Kong n musical che reporta la vita y la misicun dl Sant, da süa nasciüda tla Val Badia a so operat a San Martin cina a canche al á lascé süa tera por rové te na post tan dalunc y forest. N post olache al á albü cotan da sćiampí y ince da sofrí, n post che l’á porté a deventé instësc n cinesc.
La idea da realisé le musical é stada de pater Joseph Tan Lei Tao, sciöche al vëgn reporté sön le sit di miscionars da Steyl stadtgottes.de. Pater Tan dij che al é resté imprescioné dala biografia de Ojöp da Oies,
ci che l’á porté a deventé instës miscionar da Steyl. Tl musical vëgnel adoré porí zitac fora de lëtres originales de pater Freinademetz. Le spetacul ê tl pröm gnü conzepí sciöche teater, presenté n iade su dl 2018. Te chë ocajiun êl gnü fat n film, che á ciafé n suzes nia aspeté y vëgn sëgn mostré pro festivai internazionai. Sciöche le sit todësch reporta inant, él gnü mostré dl 2018 tl Film Festival Internazional dla Svizera, y tla Polonia ál ciafé le 2. pest pro le Festival Internazional dl film catolich. Na forma daldöt nöia de evangelisaziun, che desmostra sciöche le Sant da Oies á lascé mersces che vir inant ciamó aldedaincö.
Deplü ciafëise t’La Usc di Ladins di 7 de forá. Le musical cun sottitui todësc podëise odëi sot a chësc link
https://youtu.be/zgxZY_N19YY
Na picia cercia podëise odëi chiló:
https://www.youtube.com/watch?v=QNZHHf708BU
(pablo)